ମୋ ଦେହେ ଈଶ୍ୱର
ମୋ ଦେହେ ଈଶ୍ୱର
ଏ ଦିବ୍ୟ ତନୁ ମୋର ନୀଳକନ୍ଦର
ହୃଦୟ ଅଟେ ମୋର ଶିରୀ ମନ୍ଦିର |
ଆତ୍ମା ମୋହର ନିଜେ ଦାରୁ ଦେବତା
ପିଣ୍ଡ ବ୍ରହ୍ମାଣ୍ଡ ଏକମତ ଜାଣିଥା |
ଗର୍ଭ ମୋ ଲକ୍ଷ୍ମୀ ରୋଷଘର ପ୍ରକାର
ନିତି ଷାଠିଏ ପୌଟି ଭୋଗ ଆସର |
ବଡ଼ଦାଣ୍ଡ ଅଟଇ ଶିଶୁମ୍ନା ନାଡ଼ି
ଶରଧା ବାଲି ଚର୍ମ ରହିଛି ବେଢ଼ି |
ନନ୍ଦିଘୋଷ ଅଟଇ ମନଟି ମୋର
ରଥେ ବିଜୟ ନିଜେ ବଡ ଠାକୁର |
ପ୍ରକୃତି ଇନ୍ଦ୍ରିୟାଦି ଭକତ ଜନେ
ଟାଣି ନିଅନ୍ତି ରଥ ଆନନ୍ଦ ମନେ |
ସ୍ୱପ୍ନ ସୁସୁପ୍ତି ଜାଗ୍ରତ ଯେ ତୁରୀୟ
ଚତୁର୍ଦ୍ଧା ମୂର୍ତ୍ତି କରିଛନ୍ତି ବିଜୟ |
ମାଉସୀ ମା ମନ୍ଦିର ତ୍ରିକୂଟ ସ୍ଥାନ
ନରେନ୍ଦ୍ର ପୁଷ୍କରିଣୀ ତ୍ରିବେଣୀ ଜାଣ |
ନିଃଶ୍ୱାସ ପ୍ରଶ୍ୱାସଟି ରଜ୍ଜୁ ରଥର
ବିବେକ ବୁଦ୍ଧି ଚିତ୍ତ ଯେ ଅହଂକାର |
ଏ ଚାରି ଅଶ୍ୱ ରଥେ ଅଛନ୍ତି ରହି
ଜ୍ଞାନ ସାରଥି ରଥୀ ଜଗତ ସାଇଁ |
ଯା ଲୋମମୂଳେ ମାଳ ମାଳ ବ୍ରହ୍ମାଣ୍ଡ
ସେ ପୁଣି ବିରାଜିତ ଏ କ୍ଷୁଦ୍ର ପିଣ୍ଡ |
ନିରତେ ଜଗନ୍ନାଥ କରଇ ଧ୍ୟାନ
ହୃଦ କନ୍ଦରେ ଦିଶେ ଚକାନୟନ |
ତନୁ ମନ ପରାଣ କରି ଅର୍ପଣ
ଭକତ ବାଞ୍ଛାକଳ୍ପ ଗଲି ଶରଣ |