ମନ୍ତେଇ ନଈ

ମନ୍ତେଇ ନଈଲୋ ମନ୍ତେଇ ନଈ, 

ଗୋଡ଼ ବଢ଼ାଇଲେ ପାଇବ ନାହିଁ ll

ପ୍ରଖରସ୍ରୋତ ତୋ ଗଭୀର ଗଣ୍ଡ l

କୁମ୍ଭୀରେ ମେଲାଇ ବସନ୍ତି ତୁଣ୍ଡ ll

ମାଛ ଶୁଖୁଆରେ ଜୀବିକା କରି l

ଧୀବରେ ଚଳାନ୍ତି ଜୀବନ ତରୀ ll

ମନ୍ତେଇ ନଈଲୋ ମନ୍ତେଇ ନଈ l

ଇତିହାସ ମୂକସାକ୍ଷୀ ଲୋ ତୁହି ll

କବି ବାଞ୍ଛାନିଧି ତୋ କୂଳେ ବଢ଼ି l

ଲେଖିଲେ କବିତା ଧାଡ଼ିକି ଧାଡ଼ି ll

ଓଜସ୍ବିନୀ ଦେଶ ପ୍ରେମ ସଙ୍ଗୀତ l

ହାରମାନି ଧରି ଗାଇଲେ ଗୀତ ll

ଗୀତେ ରହି ଥାଇ ଭୀଷଣ ତାତି l

ନରନାରୀ ସର୍ବେ ଉଠିଲେ ମାତି ll

କଣେ କୁଳ ବଧୂ, ପଲ୍ଲୀ ଲଳନା l

ହସ୍ତରେ ଧଇଲେ ତ୍ରିରଙ୍ଗା ବାନା ll

ସ୍ୱାଧୀନ ସମରେ ପାତିଲେ ଛାତି l

ମରଣେ ବରଣ କରି ସୁ ନୀତି ll

ମନ୍ତେଇ ନଈଲୋ ମନ୍ତେଇ ନଈ l

ଇରମ ସଂଗ୍ରାମ ମୁଁ ଭୁଲି ନାହିଁ ll

ଇରମରେ ସେହି ରଣ ହୁଙ୍କାର l

ବ୍ରିଟିଶ ରଚିଲେ ଗଣ ସଂହାର ll

ଜାଲିଆନାବାଗ ସେ ରକ୍ତ ତୀର୍ଥ l

ଦେଶବାସୀ ଢାଳିଦେଲେ ରକତ ll

ପରି ବେଉଆ ସେ ନମସ୍ୟା ନାରୀ l

ମନେ ପଡ଼ି ହିଆ ଯାଏ ମୋ ଥରି ll

ସଗର୍ବେ କୂଳରେ ବିରାଜେ ଆଜି l

ଦେଶପ୍ରେମ ବାର୍ତ୍ତା କିରତୀ ରାଜି ll

ବରୁଣ ତୋଟା ମେଳଣ ପଡ଼ିଆ l

ବ୍ରିଟିଶ ଗୁଳିରେ ଛିଣ୍ଡେ ଫଡ଼ିଆ ll

ମନ୍ତେଇ ନଈଲୋ ମନ୍ତେଇ ନଈ l

ବଇତରଣୀକୁ ଆସିଲୁ ବହି ll

କୂଳକୁ ଆସିଲେ ଗାନ୍ଧୀ ମହାତ୍ମା l

ହରେକୃଷ୍ଣ ଗୋପବନ୍ଧୁ ଦେଶାତ୍ମା ll

ସ୍ୱାଧୀନସମରେ ଯେତେକ ବାଧା l

କୂଳେ ବସି କଲେ ସର୍ବ ମସୁଧା ll

ଦେଶପ୍ରେମେ ସିକ୍ତ ମନ୍ତେଇ ମାଟି l

ସଂଗ୍ରାମୀ ମାନଙ୍କ ସଂଗ୍ରାମ ଘାଟି ll

ମନ୍ତେଇନଈ ଲୋ ମଙ୍ଗଳେ ଥାଆ l

କୂଳେ ବସନ୍ତି ତୋ ମଙ୍ଗଳା ମାଆ ll

ଧନେଶ୍ଵର ସୌଦାଗର କିରତୀ l

ସିଂହଳରୁ ଆସି କଲେ ବସତି ll

ସାଧବର ତଅପୋଇ ଦୁଲାଳୀ l

ରାତ୍ରକାଳେ କୂଳେ ଜଗଇ ଛେଳି ll

ମନ୍ତେଇ ନଈଲୋ ମନ୍ତେଇ ନଈ l

ତୀରେ ତରଳାକ୍ଷୀ କମଳା ସାଇଁ ll

ଉତ୍କଳର ତୁହି ଐତିହାସିକା l

ମନ୍ତେଇ ମା' କେବେ ହୋଇବ ଦେଖା ll