ମନରୁ ଫେଇବା ହୀନ ଭାବନା

ଆସ ଆମେ ଯେତେ ଚେତନ ମଣିଷ

ମନରୁ ଫେଇବା ହୀନ ଭାବନା

ମିଳିମିଶି ଚଳି ଖୁସି କୋଳାକୋଳି

ଧରି ରଖିଥିବା ସଦ୍ଭାବନା ।

ଆନ ଦୁଃଖେ ଦୁଃଖୀ ଆନ ସୁଖେ ସୁଖୀ

ଦେଖାଇ ଚାଲିବା ମହତପଣ

ପରବତମାଳା ସମ ଠିଆ ହୋଇ

ଥାପିବା ହାତେ ହାତ ଜଣୁ ଜଣ ।

ନିଃସ୍ବାର୍ଥ ଭାବରେ ଆନ ଉପକାରେ

ରହିଥିବା ନିତି ଜୀଇଁ ଜୀବନ

ଆନନ୍ଦାନୁଭବ କେତେ ମିଳୁଥିବ

ଏକଥା ବି ବୁଝି ପାରିବ ମନ ।

କିଆଁ ହୀନ ଭାବ ମନରେ ଧରିକି

ଆନ ପାଖେ ହେଉଥିବା ଘୃଣିତ

ଦେହ ସୁଖ ପରା ଏ ଧନ ସମ୍ପତ୍ତି

ଦେଖାଇ ପାରେ କି ଜୀବନ ପଥ ।

କେହି ସାନ ନୁହେଁ କେହି ବଡ଼ ନୁହେଁ

କେହି ବି ନୁହଁଇ ହୀନ ନଗଣ୍ୟ

ପ୍ରତ୍ୟେକ ନିଜ ନିଜର କର୍ମଭାଗୀ

ସଂସାର ବୁକେ ଜୀବନ ଧାରଣ ।

ସବୁରି ଦେହରେ ଜୀବ ପରମାତ୍ମା

ଏକାକାର ହୋଇ କରନ୍ତି ଖେଳା

ଆମେ ଯେତେଦିନ ଜୀଇଁବା ମରତେ

ଏକତ୍ବ ମନ୍ତ୍ରରେ ବାନ୍ଧିବା ଭେଳା ।