ମନୋଦଶା
ମନୋଦଶା
ଆହେ ମନୋନୟ କରୁଛ ଅଥୟ
ମନେ ପଡେ ପୂର୍ବ ସ୍ମୃତି
ତୁମେ ହିଁ ତ ସେହି ଦୁଃଖର କାରକ
କାଢି ନେଲ ନେତ୍ର ଜ୍ୟୋତି ।
ଚିତ୍ତାକର୍ଷକରେ ରଙ୍ଗର ଗାରିମା
ମନୋରଞ୍ଜନ ଦାୟକ
ତୁମେ ପଞ୍ଚରତ୍ନ ତୁମେ ରାଧାକାନ୍ତ
ତୁମେ ପୁଣି ଦିଅ ଶୋକ ।
ସ୍ନେହ ଶ୍ରଦ୍ଧା ପ୍ରେମ ମହାଜନୀ କାମ
ଆରମ୍ଭରୁ ତୁମେ ଅନ୍ତ
ଜନ୍ମିତ ଓଠରେ ହସ ରଙ୍ଗ ଦେଇ
ପ୍ରଦୋଷେ ପ୍ରଦ୍ୟୋତ ମୃତ ।
ରଙ୍ଗ କୌତୁହଳ ରଙ୍ଗ ଯେ ଗରଳ
ଅନୁଚିତ ବ୍ୟବହାରେ
ପ୍ରବଞ୍ଚକ ଠକ ବିଷାକ୍ତ ମିଶ୍ରଣେ
ଛଳରେ ପ୍ରାଣକୁ ହରେ ।
ତୁମେ ଯେ ବନ୍ଦିତ ତୁମେ ଆରାଧିତ
ତୁମେ ଅର୍ଘ୍ୟ ତୁମେ ପୂଣ୍ୟ
ତୁମରି କୃପାରୁ ଆତ୍ମୀୟତା ସୃଷ୍ଟି
ସରବେ ହୁଅନ୍ତି ଧନ୍ୟ ।