ମନେପଡ଼ ତୁମେ-୩

ସମୟ ସୂଅରେ ଆସି ଭାସିଗଲ                   

କେମିତି ଭାବିଲ ପର,

କହିଛି କହିବି କେତେ କେତେ କଥା

ଲେଖିବି ଅନେକ ଥର।

ମୁଁ ଯେ ଯାଯାବର ଅନ୍ଧାର ରାତିର

ବାଟଭୂଲା ସାଥି ଏକା,

ମନେପଡ଼ ତୁମେ ମନେପଡେ ତୁମ

ପହିଲି ଫଗୁଣ ଦେଖା ।

ଭୂଲି କି ପାରିବି ସାଥି ତୁମବିନା

ଅଭୁଲା ସ୍ମୃତିରୁ କେତେ,

ନୀରବ ରହିଲେ ନୀରବ ରହିବି

ଭୁଲ ବୁଝିବନି ମୋତେ।

ଚୁନାଚୁନା କଲ ସୁନା ହୃଦୟ ମୋ

ଏମିତି ଖେଳିଲ ଖେଳ,

ଅସରନ୍ତି ପଥ ଚାଲିବି କେମିତି

କ୍ଷୀଣ ହୁଏ ମନବଳ ।

ଆସିଥିଲି ଦିନେ ଚାଲିଯିବି ଦିନେ

ଯିବାବେଳେ ଯିବି ଏକା,

ଏତେ ଯେ ପ୍ରତୀକ୍ଷା ଏଯାଏଁ ସରିନି

ଯାହା ମୋ ଭାଗ୍ୟରେ ଲେଖା ।