ମନ୍ଦିରେ ଲାଗିଲା ତାଟି

ଆଡ଼ପ ମଣ୍ଡପେ ବସିଛି କାଳିଆ 

ଉଭା ଯାତ୍ରା କରି ଶେଷ l

ଭାଇ ଭଗ୍ନୀ ସଙ୍ଗେ ଭକତ ଗହଳେ 

ଲାଗିଛି ଗୁଣ୍ଡିଚା ରାସ ll

ହଳି ବୋଲୁଥାନ୍ତି ଧନ୍ୟ ତୋ ଭକତ 

ଧନ୍ୟ ତୁ ଆରେ କହ୍ନାଇ l

ତୋ ବୋଲେ ରେବତୀ ଦେବୀଙ୍କୁ 

କେନ୍ଦରାପଡ଼ାରେ ଛାଡ଼ିଛି ମୁହିଁ ll

ମହା ଉଲ୍ଲାସରେ ଯାତ୍ରା ଆମ୍ଭେ କଲେ 

ଭକ୍ତ କଲେ କୋଳା କୋଳି l

ଲକ୍ଷ୍ମୀ ଠାକୁରାଣୀ କେମନ୍ତେ ଅଛନ୍ତି 

କହ୍ନାଇ ଗଲୁକି ଭୁଲି ll

ହଟିଆ ଠାକୁର କାହ୍ନୁ ବୋଲୁଥାନ୍ତି ଶୁଣ 

ଆହେ ବଡ଼ ଭାଇ l

ମଥା ଘୁରିଯାଏ ଲକ୍ଷ୍ମୀ ରୋଷ ଚିନ୍ତି 

ନାଆଁ ତା ଧରନ୍ତୁ ନାହିଁ ll

ଭାଇ ମାନଙ୍କର କଥାରେ ସୁଭଦ୍ରା 

ହସିଦେଲେ କିରି କିରି l

ନିଶି ଦେବୀ ପେଚା ବସି ଶୁଣୁଥିଲା 

ଗମ୍ଭୀରାରୁ ଗଲା ଉଡ଼ି ll

କାନ୍ଦି ଲୋଟୁଛନ୍ତି ବିଶ୍ୱ ଠାକୁରାଣୀ 

ସାତ ଦିନ ଗଲା ବିତି l

ନିଶି ଠାରୁ ଶୁଣି ଠାକୁରାଣୀ ରାଗ 

ପଞ୍ଚମକୁ ଗଲା ଉଠି ll

ମାଉସୀ ବାଡ଼ିକି ବୁଲି ଗଲ ତୁମେ 

ସଙ୍ଗେ ନେଇ ଭଉଣୀକି l

ଲକ୍ଷ୍ମୀ ଠାକୁରାଣୀ ମୁଁ ତୁମ ଘରଣୀ 

ହେଲି ମୁଁ ଠାଇଁଆଣି କି? 

ଭୋଜନେ କି କେବେ ହେଳା କଲି 

ପ୍ରଭୁ କୁହ ଜ୍ୟେଷ୍ଠ ଭାଇ ହଳି l

କିବା ଦୋଷ କଲି ଶୀରିମନ୍ଦିରରେ 

କଲ ମୋତେ ଜଗୁଆଳି ll

ନାଟ ଗୋବର୍ଦ୍ଧନ ହଳଦୀମୁହିଁଟା 

ଭାଇଙ୍କୁ ଶିଖାଏ ନିତି l

ଆସ ଆସ ତୁମ ମଜା ଛଡ଼ାଇବି 

ମନ୍ଦିରେ ଲାଗିଲା ତାଟି ll