ମନ ମାହାତ୍ମ୍ୟ-୫

କାକର ପରିକା ମନଟିକୁ ଯଦି

ଆମେ ସଦା ଭିଜାଇ ରଖୁଥିବା,

ହୀରା ମୋତି ସମ ଶୁଭ୍ର ଜ୍ୟୋତି ବିନ୍ଦୁ

ଝଟକି ଦିଶିବ କି ମନଲୋଭା !

ବର୍ଷାରାଣୀ ପରି ରିମ୍ ଝିମ୍ ଛନ୍ଦ

ତୋଳି ମନ ଯଦି ଗାଇବ ଗୀତ,

ସେ ମଧୁ ରାଗିଣୀ ପୁଲକେ ପୁଲକି

ମାଟି ଦେହର ବଢ଼ିବ ମହତ୍ତ୍ବ ।

ଆନ ପାଇଁ ଯଦି ଜଣକ ହୃଦୟୁ

ପ୍ରୀତି ଫରୁଆରୁ ପ୍ରୀତି ଝରିବ,

ସେ ପ୍ରୀତି ରଙ୍ଗକୁ ମାଖି ଜଣେ ନିଶ୍ଚେ

ରଙ୍ଗ ଫୁଆରାକୁ ବାନ୍ଧି ରଖିବ ।

ଶାନ୍ତି ତୃପତିରେ ମନଟିକୁ ଯଦି

ସଦା ଭିଜାଇ ରଖି ପାରୁଥିବା,

ଦୁଃଖ କ୍ଳେଶ ସ୍ପର୍ଶ ନ କରି ଜୀବନେ

ସୁଧା ପାନ ସମ ଅନୁଭବିବା ।

ସୁଚିନ୍ତନେ ଯଦି ମନ ଭିଜାଇବା

ସୁକର୍ମରେ ତାହା ପ୍ରତିଫଳିବ,

ସୁଫଳକୁ ଲଭି ଆନନ୍ଦ ଉଲ୍ଲାସେ

ମାନବ ଜନମ ସାର୍ଥକ ହେବ ।