ମମତା ଡୋରି
ମମତା ଡୋରି
ମମତା ଡୋରିରେ ବନ୍ଧା ଏ ସମ୍ପର୍କ
ବିଧାତାର ଆଶୀର୍ବାଦ
ରଙ୍କୁଣୀ ଧନରେ ଭାଙ୍ଗିବନି କେବେ
ସମ୍ପର୍କର ସେତୁବନ୍ଧ ।
ମୁଁ ଥିବାଯାଏଁ ଆଖି ପଲକରେ
ରଖିଥିବି ଧନ ତୋତେ
ଆସୁ ପଛେ ଯେତେ ବାଧା କି ବିପତ୍ତି
ଦୁଃଖ ହେଉପଛେ ମୋତେ ।
ଭାରି ସ୍ୱାର୍ଥପର ମଣିଷ ଜାତିଠୁ
ରହିବୁ ତୁ ଦୂରେ ଦୂରେ
ଚମଡା,ଦାନ୍ତର ଲୋଭରେ ପାଗଳ
ଜୀବନ ତୋ' ନେଇପାରେ ।
ସାଥେ ସାଥେ ମୋର ରହିଥିବୁ ସଦା
ଏଇ ବନ ଆମଘର
ମୋ'ଠାରୁ ଦୂରେଇ ଯିବୁ ଯଦି ବାୟା
ହୃଦୟ କାନ୍ଦିବ ମୋର ।
ପଶୁ ହୋଇଲେ ବି ମାଆ ମନ ମୋର
ତୋ' ଖୁସିରେ ହୁଏ ତୋଷ
ନିଜେ କଷ୍ଟ ସହି ତୋ' ଜୀବନରେ
ବୁଣୁଥିବି ମୁଁହିଁ ହସ ।