ମଲା ନଈ

"ତୁମେ କହୁଛ ଯା' ବହି

ହେଲେ, କେମିତି ବହିବି ?

ମୁଁ ପରା ମଲା ନଈ !

ଡିନାମାଇଟ୍‌ ବିଷ୍ଫୋରିତ ଗିରି କନ୍ଦରରୁ,

ସବୁଜିମା ବିବର୍ଜିତ ମାଳ କାନ୍ତାରରୁ,

ଧୂଳିଧୂସରିତ ରୁକ୍ଷ ମରୁପ୍ରାନ୍ତରରୁ,

ତୁମେ କହୁଛ ଯା' ବହି,

ହେଲେ, କେମିତି ବହିବି ?

ମୁଁ ପରା ମଲା ନଈ !

ମୋର ବକ୍ଷେ ଲଦିଦେଇ ଆବର୍ଜନା ଭାର,

ଶାଖା ପ୍ରଶାଖାରେ ଭରି ଶିଳ୍ପର ଜହର,

ତୁଣ୍ଡେ ଦେଇ ନିରିମାଲ୍ଯ ବିଷାକ୍ତ କୃଷିର,

ତୁମେ କହୁଛ ଯା' ବହି

ହେଲେ, କେମିତି ବହିବି ?

ମୁଁ ପରା ମଲା ନଈ !

ପ୍ରଗତି ନାମେ ଶୋଷିଛ ମୋ ଜୀବନ ଧାରା,

ଶିଳ୍ପ ନାମେ ଶୋଷିଅଛ ମୋ ଶିରାପ୍ରଶିରା,

କଣ୍ଠରୁଦ୍ଧ କରିଛ ମୋ ଦେଇ କଂକ୍ରିଟ୍‌ ଘେରା,

ତୁମେ କହୁଛ ଯା' ବହି  

ହେଲେ, କେମିତି ବହିବି ?

ମୁଁ ପରା ମଲା ନଈ !

ପାହାଡ଼ି ଝରଣା ଯେତେ ସବୁ ଗଲେ ଶୁଖି,

ମୌସୁମୀ ଆସୁନି ଆଉ ମୋ ଗୁମାନୀ ସଖି,

ମରୁ ପଥେ ଠେଲିଦେଲ କରି ଉର୍ଦ୍ଧ୍ବମୁଖି,

ତୁମେ କହୁଛ ଯା' ବହି

ହେଲେ, କେମିତି ବହିବି ?

ମୁଁ ପରା ମଲା ନଈ !"