ମଝି ନଈରେ ଜୀବନ

ଜଳି ଜଳି ଗଲା ମନଟି ମୋହର

ଜଳିଲା ସପନ ଘର

କଥା ପଦେ ତୁମେ କହିଦେଲ ସଖୀ

ଆଖି ହେଲା ଛଳ ଛଳ I

ଜୀବନର ନଈ ପାରି ହେଉଥିଲି

ମନେ ମନେ ହୋଇ ଖୁସି

ସବୁ ଖୁସି ମୋର ଛଡାଇ ନେଲା ଲୋ

ଅଦିନ ଝଡଟେ ଆସି I

ଭସାଇ ନେଲା ମୋ ଦଦରା ନାଆକୁ

ବେସାହାରା ଗଲି ହୋଇ

ଉବୁଟୁବୁ ହୁଏ ମଝି ନଈରେ ମୁଁ

ପହଁରା ତ ଜାଣି ନାହିଁ I

ଆଖିରେ ରଖିଛି କେତେ ଯେ ସପନ

ଦେଖିବାକୁ ନାହିଁ ବେଳ

ମଝି ନଈରେ ମୁଁ ଭାସୁଛି ଏକାକୀ

ଦେଖା ଯାଉ ନାହିଁ କୂଳ I

ହଜି ହଜି ଯାଏ ସ୍ୱର ମୋ କଣ୍ଠରୁ

ବଢୁଛି ବଢନ୍ତା ନଈ

ବେସୁରା ରାଗରେ ଗୀତ ଗାଉଛି ମୁଁ

ତୁମପାଇଁ ତୁମପାଇଁ I