ମିଛ
ମିଛ
ମିଛ କହିବାକୁ ଭଲ ଲାଗେ ନାହିଁ
କହୁ ନାହିଁ ଜମା ମିଛ
ଏଇ ଦୁନିଆରେ ଏଇ ତ ସଂସାର
ହୁଏ ନାହିଁ କେବେ ତୁଚ୍ଛ ।
ତୁଚ୍ଛ ଯଦି କେବେ ମଣୁଥାନ୍ତା କିଏ
କୁହନ୍ତାନି କେବେ ମିଛ
ଏ ଘର ମାଉସୀ ସେ ଘର ପିଉସୀ
ହେଇ ଲଗାନ୍ତାନି ଖଛ ।
ପର ଆପଣାର ଦେଖନ୍ତାନି କେବେ
ରଖନ୍ତାନି ଭେଦଭାବ
ପାତର ଅନ୍ତର ନିତି କରନ୍ତାନି
ମନେ ବହି ଅହଂଭାବ ।
ନିଜକୁ ସେ ବଡ ମନେ କରନ୍ତାନି
ମିଛ ଉପାଧିକୁ ପାଇ
ସଲା ସୁତର ସେ ହୁନ୍ଦର କରିଣ
ମୁଣ୍ଡ ଯାଆନ୍ତାନି ଖାଇ ।
ଆଙ୍ଗୁଠି ଅଗରେ ନଚାନ୍ତାନି କେବେ
କରି ସେ ଗାତୁଆ ମୂଷା
ମୂଷା ବିଲେଇର ଖେଳ ସେ ଖେଳେଇ
ନିଜେ ବସାନ୍ତାନି ବସା ।
ସର୍ବେ ସର୍ବା ହର୍ତ୍ତାକର୍ତ୍ତା ଭାବନ୍ତାନି
ଖଳନାୟିକା ସେ ସାଜି
ଖଳନାୟକକୁ ବାହୁ ଡୋରେ ଛନ୍ଦି
ନିଜେ ମାରନ୍ତାନି ବାଜି ।
ସତ୍ୟତା ଭିତରେ ଆଖି ତ ପକାଅ
ବେଶୀ ଲୁଚି ଅଛି ମିଛ
ମିଛଟାରେ ଖାଲି ତୁଣ୍ଡେ କହୁଅଛି
କହୁଛି ଜୀବନ ତୁଛ ।
ଭିତରେ ଭରିଛି ଅନେକ ସପନ
ଅଛି ଆଶା ଅସୁମାରୀ
ଉପରକୁ ଖାଲି କହୁଅଛି ମିଛେ
ନୁହନ୍ତି କେହି କାହାରି ।
ଯଦି ଲୋଭ ରହି ନାହିଁ କାହା
କାହିଁକି ଝଗଡା କରେ
ଉପରେ ଉପରେ ଭଲେଇ ହେଇଣ
ଭିତରେ ସମ୍ପଦ ହରେ ।
ଝରାଇ ଦିଏ ସେ ଆଖିରେ ଶ୍ରାବଣ
ଫଗୁଣ ଯାଅଇ ହଜି
ଫିକା ପଡିଯାଏ ଫଗୁର ଅବିର
ଆଖି ଲୁହେ ଥାଏ ଭିଜି ।
ଭିଜି ଥାଏ ପଛେ ମୋର ମୋର କହେ
କହେ ମୋର ପରିବାର
ସ୍ବାର୍ଥ ଲାଳସାରେ ସମ୍ପତ୍ତି ହରଇ
କରେ ଚୋରା କାରବାର ।
ରାଜନୀତି ପାଠ ବଡ ତ ଗଭୀର
ସତ୍ୟତା ପଡଇ ବଳି
ମିଛର ସାହାରେ ଚାଲୁଛି ଜଗତ
ନିଜେ ତାହା ଯାଅ କଳି ।
ବିବାହ ସମୟେ ବୟସ ଲୁଚାନ୍ତି
ସତ କୁହନ୍ତିନି କେବେ
ଭତ୍ତା ପାଇବର ସମୟ ଆସିଲେ
ମିଛରେ ବଢାନ୍ତି ବେଗେ ।
ଚୋରୀ,ଦାରୀ, ନାରୀ ପାଖରେ ବହୁତ
ଭରି ରହିଥାଏ ମିଛ
ନିଜ ରୋଜଗାର ଲୁଚାନ୍ତି ସଭିଁଏ
ନେଇ ଖାଉଥିବା ଲାଞ୍ଚ ।
ଅନ୍ୟର ଘରକୁ କ୍ଷଣିକେ ଭାଙ୍ଗନ୍ତି
ମିଛ ନାଲବାଲ କରି
ସହି ପାରନ୍ତି ନି କାହାର ସେ ଖ୍ୟାତି
କା' ସୁଖ ସମ୍ପଦ ଶିରି ।
ପୁରୁଷ ଅପେକ୍ଷା ନାରୀମାନେ ବେଶୀ
ଈର୍ଷା ପରାୟଣ ହୋନ୍ତି
କିଏ ଯଦି କେବେ ଆଗକୁ ଯାଆନ୍ତି
ତା'ର ଶତ୍ରୁ ପାଲଟନ୍ତି
ସହି ପାରନ୍ତିନି କାହାର ସେ ଯଶ
ତାକୁ କଲେ ଅତିକ୍ରମ
ଷଡଯନ୍ତ୍ର ହୀନ ଚକ୍ରାନ୍ତ କରିଣ
କରି ଦିଏ ବଦନାମ ।
ସବୁ ଶାମୁକାରେ ମୋତି ତ ନଥାଏ
ସବୁ ନାରୀ ସେହି ପରି
ନୁହଁନ୍ତି କୁତ୍ସିତ ବିକୃତ ମସ୍ତିଷ୍କ
ନୁହନ୍ତି ବି ଅହଂକାରୀ ।
ରାମାୟଣ ଅବା ଇତିହାସ ଦେଖ
ଦେଖ ତ ପୁରାଣ ଶାସ୍ତ୍ର
ପୁରଷ ଅପେକ୍ଷା ନାରୀମାନେ ବେଶୀ
ସବୁଥିରେ ସିଦ୍ଧ ହସ୍ତ ।
ପୁଅ ଝିଅ ପଟା ପଟି ହେଲା ବେଳେ
ସେଠି ଭରା ଥାଏ ମିଛ
ଉପରେ ଯାହା ସେ ସବୁ କହୁଥାଏ
ଲୁଚି ରହେ ସତ ପଛ ।
ସବୁ ଓଠେ ମିଛ ଭରି ରହି ଅଛି
ମିଛେ ସବୁ ଧୁରନ୍ଧର
କାହା ମିଛ ପୁଣି ସଂସାର ବଞ୍ଚଇ
ମିଛରେ ଜଳେ ସଂସାର ।
ଏମିତି ସଂସାରେ କେହି ଜଣେ ନାହିଁ
ମିଛ ଜମା କହି ନାହିଁ
ଧର୍ମରାଜ ଯୁଧିଷ୍ଠିର ଧର୍ମ ଯୁଦ୍ଧେ
ମିଛ ବି ତ ଥିଲେ କହି ।
କାହା ମିଛେ ଯଦି ସତ୍ୟତା ଆସଇ
ରହେ କାହାର ଜୀବନ
ସେହି ମିଛ କେବେ ପାପ ଆଣେ ନାହଁ
ପୂଣ୍ୟ ମାର୍ଗ ଉନ୍ମୋଚନ ।
ସନ୍ତାନ ସୁଖର ସପନର ପାଇଁ
ମାଆ ମିଛ କହୁଥାଏ
ନିଜ ମୁଣ୍ଡକୁ ସେ ଦୋଷ ନେଇ
ସନ୍ତାନେ ସୁରକ୍ଷା ଦିଏ ।
ମିଛକୁ ଲେଖିଲେ ଯୁଗ ସରି ଯିବ
ସିଏ ସରିବନି ଜମା
ମିଛ ଯଦି ଥରେ ଆରମ୍ଭ ହୁଅଇ
ରହେନି ଫୁଲଷ୍ଟପ୍ କମା ।
ଏଇ ଦୁନିଆରେ ମରିବାଟା ସତ
ଆଉ ସବୁ ଅଟେ ମିଛ
ମିଛ ଦୁନିଆରେ ମିଛ ଅଭିନୟ
ମିଛର ସମ୍ପର୍କ ମିଛ ।