ଲାଇବ୍ରେରୀ
ପ୍ରୋଫାଇଲ୍
ମହାପ୍ରଭୁଙ୍କ ବାହୁଡା ଯାତ୍ରା
ମହାପ୍ରଭୁଙ୍କ ବାହୁଡା ଯାତ୍ରା
ଆଷାଢ ଶୁକ୍ଳ ଦଶମୀ ତିଥିରେ ।
ବାହୁଡିବେ ରଥେ ତିନି ଠାକୁରେ ।।
ଗୋଟି ପହଣ୍ଡିରେ ଯିିବେ ଠାକୁର ।
ବାହୁଡା ଯାତରା ହେବ ତାଙ୍କର ।।
ନଅ ଦିନ ତାଙ୍କ ରଥଯାତରା ।
ଭକତଙ୍କର ସେ ସୁଖ ଅସରା ।।
ଗୁଣ୍ଡିଚାଘରକୁ ଆସି ସେ ଥିଲେ ।
କେତେ କେତେ ଲୀଳା ତହିଁ ରଚିଲେ ।।
ଜନମ ବେଦୀରେ ସାତଟି ଦିନ ।
ରହିଲେ ମୋ ପ୍ରଭୁ ଚକାନୟନ ।।
ଗୁଣ୍ଡିଚା ମା'ଙ୍କ ରାନ୍ଧଣା ଖାଇ ।
ଆନନ୍ଦରେ ପ୍ରଭୁ ହୋଇଲେ ବାଇ ।।
ମା'ଙ୍କଠୁ ପାଇ ସ୍ନେହ ଆଦର ।
ସବୁ ବରଷ ମୋ କଳାଠାକୁର ।।
ଆସନ୍ତି ଆନନ୍ଦେ ଗୁଣ୍ଡିଚା ବାଡି ।
ଭକତେ ଟାଣନ୍ତି ରଥ ଦଉଡି ।।
ହେରାପଞ୍ଚମୀରେ କମଳା ଆସି ।
ରଥ ଭାଙ୍ଗିଦେଇ ଗଲେ ସେ ରୋଷି ।।
ଦୁଇ ଦିନ ପରେ ଫେରିିବା ପାଇଁ ।
କଥା ଦେଇଥିଲେ କମଳାସାଇଁ ।।
ଆଡପ ଦର୍ଶନ ଦେଲେ ଶ୍ରୀହରି ।
ଭକତଙ୍କ ଗଲା କାମନା ପୂରି ।।
ନବମୀରେ କରି ସନ୍ଧ୍ୟା ଦର୍ଶନ ।
ପୁଲକିତ ହେଲା ଭକତ ମନ ।।
ନାକଚଣା ଦ୍ଵାର ପାଖକୁ ଚାହାଁ ।
ତିନିରଥ ଆସି ହେଲେଣି ଠିଆ ।।
ବାହୁଡିବେ ବୋଲି କଳାଠାକୁର ।
ମାଉସୀ ମାଆର ମନ ଅଧୀର ।।
ବଳଗଣ୍ଡିଠାରେ ହୋଇବେ ଠିଆ ।
ପୋଡପିଠା ଦେଇ ତୋଷିବେ ହିଆ ।।
ପୋଡପିଠା ଖାଇ ଖୁସି ମନର ।
ବାହୁଡିବେ ପ୍ରଭୁ କଳାଠାକୁର ।।
ଲକ୍ଷ୍ମୀନାରାୟଣ କଳି ଲାଗିବେ ।
ମଧ୍ୟସ୍ଥତା ଗଜପତି କରିବେ ।।
କଳି ତୁଟିଗଲେ ସିଂହଦୁଆରେ ।
ବିଜୟ ହୋଇବେ କଳାଠାକୁରେ ।।
ଏକାଦଶୀରେ ସୁନାବେଶ ହେବେ ।
ଦ୍ଵାଦଶୀ ଅଧରପଣା ପାଇବେ ।।
ତ୍ରୟୋଦଶୀ ଦିନ ଆସିବ ଯେବେ।
ନୀଳାଦ୍ରିକନ୍ଦରେ ବିଜେ ହୋଇବେ ।।
ରସଗୋଲା ଦେଇ ଲକ୍ଷ୍ମୀଙ୍କୁ ତୋଷି ।
ରତ୍ନସିଂହାସନେ ବସିବେ ଆସି ।।
ରଥରେ ଦେଖିବ କଳାଠାକୁର ।
ବାମନ ସେ ତାଙ୍କୁ ମନେ ବିଚାର ।।
ଗୁଣ୍ଡିଚା ବାହୁଡା ଯାତ୍ରା ଦେଖିବ ।
ପୁନର୍ଜନମରୁ ମୁକତ ହେବ ।।
ମାନବୀୟ ଲୀଳା କରନ୍ତି ହରି ।
ଦର୍ଶନେ ପତିତେ ଯାଅ ତରି ।।
