ମହାବିଦ୍ୟା ମାଆ ତାରା

   

ଜୟ ମାଆ ତାରା ତୁହି ବିଶ୍ବମ୍ଭରା

    ଜୟ ତୁ କରୁଣାମୟୀ l

ଦକ୍ଷଯଜ୍ଞ କାଳେ ଝାସ ଦେଲୁ ମାଆ

   ପିତା ଯଜ୍ଞକୁଣ୍ଡେ ଯାଇ ll

କରାଳ ବଦନୀ ମାଆ ତ୍ରିନୟନୀ

   ପୀନସ୍ତନୀ ଲମ୍ବୋଦରୀ l

କରାଳ ଦଶନୀ ଉନ୍ମୁକ୍ତ ଜଘନୀ

  କାତ୍ୟାୟନୀ ମାହେଶ୍ୱରୀ ll

ଖଡ଼ଗ ଖେଟକ ଖର୍ପର ଧାରିଣୀ

   ନାନା ଅସ୍ତ୍ରେ ବିଭୂଷିତା l

ଜୟ ଜଗଦମ୍ବା ଗୋଉରୀ ତୁ ଅମ୍ବା 

  ମାଆ ଲୋ ଅପରାଜିତା ll

ଉଗ୍ରେ ଉଗ୍ରତାରା ଦୟାମୟୀ ପରା

   ମାଆ ନୀଳ ସରସ୍ୱତୀ l

ଘନନୀଳ ରୂପୀ କରାଳୀ କଳାପୀ 

   ଅଟୁ ଦୟାବତୀ ଅତି ll

ଜୟ କପାଳିନୀ ନୃମୁଣ୍ଡ ମାଳିନୀ

   ମୃଗ ଜୀନ ପରିହିତେ l

ଜୟ ଚତୁର୍ଭୁଜା ମାଆଲୋ ଗିରିଜା

    ବିଶ୍ଵମୟୀ ବିଶ୍ଵହିତେ ll

ଜୟ ବେତାଳିକା ମନ୍ଦାର ମାଳିକା

    ଶାନ୍ତି ମୁକ୍ତି ଜ୍ଞାନଦାତ୍ରୀ l

ଧ୍ୟାନେ ତୋର ସଦା ଜୟ ମା ବରଦା

    ପାହିଯାଏ କାଳରାତ୍ରୀ ll

ଶୁଦ୍ଧ ସିଦ୍ଧି ଦାୟୀ ମାଆ ଲୋ ତନ୍ମୟୀ 

    ଜୟ ମା' ବିଶ୍ବ ଜନନୀ l

ତୋ ପଦେ ବନ୍ଦଇ ମାଆ ମହାମାୟୀ 

   ନମସ୍ତୁତେ ନାରାୟଣୀ ll