ମହାବାହୁ ଥାଉ ଥାଉ

ଶୁଖୁନାହିଁ ଲୁହ କାନ୍ଦି କାନ୍ଦି ମୋର

କେତେ କନ୍ଦାଇବ ଆଉ,

ମୋ ଦୁଃଖ ଆରତ କେବେ ଏଡାଇବ

ମହାବାହୁ ଥାଉ ଥାଉ ।

ଶୁଖିବନି କେବେ ଯେତେ କାନ୍ଦିଲେବି              

ଏ ଦୁଃଖ ସାଗର ଢେଉ,                 

କରମର ଫଳ ଅଲିଭା ଅନଳ               

ସଦା ଜଳେ ଦାଉ ଦାଉ ।               

କର୍ମର ପଥିକ ପଥ ହିଁ କରମ

କର୍ମ ହିଁ ଗନ୍ତବ୍ୟ ହେଉ, 

ଜାଗ ଉଠ ଗଢ କର୍ମର ନିଶୁଣି

ଲୁହ ଲହୁ ଦେଉ ଦେଉ ।

ରାମାୟଣ ଗୀତା ପୁରାଣ ସଂହିତା             

ନିତିଦିନ ଶୁଣୁ ଗାଉଁ, 

କଲୁନାହୁଁ କେବେ ତାହାର ପାଳନ              

ଏ ଜୀବନ ଯାଉ ଯାଉ ।

ସୁଖ ଦୁଃଖ ଲୁହ ଆରତର ଡୋରି

ତୁମ ହାତେ ସଦା ଥାଉ,

ହରିବ ସେ ଦୁଃଖ ଆହେ କଳାମୁଖ

ଦାସ କହେ ଗାଉ ଗାଉ ।