ମଧୁର ବଂଶୀ ସ୍ଵନ
ମଧୁର ବଂଶୀ ସ୍ଵନ
କାହ୍ନାମୟ ପ୍ରଭୁ କରିଦିଅ ତୁମେ
ସକଳ ବିଶ୍ୱ ପ୍ରାଣ
ନିୟୁତ କଣ୍ଠୁ ଝରିପଡ଼ୁ ତଵ
ମଧୁର ବଂଶୀ ସ୍ଵନ ।
ଅପସରି ଯାଉ ଦୁର୍ଦ୍ଦିନ ନିଦାଘ
ଶ୍ରାବଣ ର ଅହଂକାର
ପ୍ରଶାନ୍ତି ମଳୟ ଆନମନା କରୁ
ବିଭୀଷିକା ହେଉ ଦୂର ।
ପ୍ରୀତି ବନ୍ଧନରେ ବାନ୍ଧି ଦିଅ ପ୍ରଭୁ
ତୁମ ଭକ୍ତି ସିକ୍ତ ଡୋରେ
ପ୍ରଶମିତ ହେଉ ଅଶାନ୍ତ ଏ ଧରା
ହିଂସା ଯାତନାଠୁ ଦୂରେ ।
ବନ୍ଦୀ ନହେଉ ପ୍ରାଣ ପକ୍ଷୀ ଏଠି
ସୃଷ୍ଟ ନିଜ କାରାଗାରେ
ମୁକ୍ତି ଆନନ୍ଦେ ଉଲ୍ଲସିତ ହେଉ
କୁସୁମିତ ଧରଣୀରେ ।
ପ୍ରତି ପ୍ରାଣେ ପ୍ରଭୁ ଜାଗ୍ରତ ହେଉ
ତୁମରି ପବିତ୍ର ନାମ
ମାୟା ଚକ୍ଷୁ ଫେଇ ଦେଖୁ ଏ ମାନବ
ମୁକ୍ତିର ସମ୍ମୋହନ ।
ବନ୍ଦନା ଯା'ର କରେ ନିତି ପ୍ରତି
ଜଳ, ସ୍ଥଳ, ନୀଳ ନଭ
ନିର୍ଦ୍ଦେଶରେ ତଵ ନଭୋଗୁ ଏ ଜୀବ
ଯାତନାର ପରାଭଵ ।
ଈର୍ଷା ଆଶଙ୍କିତ ଏ ମଣିଷ ରକ୍ତ
ସ୍ୱଚ୍ଛ ହେଉ ଧୀରେ ଧୀରେ
ଚିନ୍ତି ତୁମ ନାମ ସର୍ବ ବିଶ୍ୱ ପ୍ରାଣ
ଆର୍ଦ୍ର ହେଉ ଭକ୍ତି ନୀରେ ।
ଢାଳେ 'ଗୀତାଞ୍ଜଳି'ଶ୍ରଦ୍ଧାର ଆଞ୍ଜୁଳି
ଏଇ ମୋର ନିବେଦନ
ଏ ମନ ଶରୀର କରିଦିଅ ପ୍ରଭୁ
ଭକତିର ବୃନ୍ଦାବନ ।