ମୈତ୍ରୀ ମିଳନ ମୁହୂର୍ତ୍ତ

କୃତ୍ରିମ ଆଲୋକ ବର୍ଜନ ସାପେକ୍ଷ

     ପ୍ରକୃତି କୋଳରେ

    ପ୍ରାକୃତିକ ଦୀପ ଜାଳି ।

ସମ୍ପ୍ରତି ଭାରତ  ମହାସଂଗ୍ରାମକୁ

      ହାର୍ଦ୍ଦିକ ସମ୍ମତି

   ଦେଇ,ବାଢ଼ିବା ଅଞ୍ଜଳି ।

ଅଞ୍ଜଳି ବାଢିବା କରତାଳି ଦେବା

     ମଉନେ କରିବା

    ବେଦର ସ୍ମୃତି ଚାରଣ ।

ବୈଦିକ ମୁନିବ୍ୟ ଦଧୀଚି ଉବାଚ

     ଭୁଲିନି ଭାରତ

   ମନ୍ତ୍ରମୁଗ୍ଧ ସୁପ୍ରାଚୀନ ।

ଭାରତ ଐତିହ୍ୟ କେବେ ବି ଗାଏନି

      ତା' ପୂର୍ବ ପୁରୁଷ

    ଦୁର୍ବଳ କୀର୍ତ୍ତିର ଗାଥା ।

ଶୌର୍ଯ୍ୟ ବୀର୍ଯ୍ୟଶାଳୀ ଅହିଂସା, ପ୍ରୀତିର

      ସଙ୍ଗୀତ ଗାଏ ସେ

    ଟେକି ଗରୀୟସୀ ମଥା ।

କାହାରି ଅନିଷ୍ଟ  ନୁହେଁ ତା' ଅଭୀଷ୍ଟ

      ଦେଇ ଜାଣେ ସିଏ

    ନେଇ ତ ଶିଖିନି କେବେ ।

ଧର୍ମ ନିରପେକ୍ଷ   ସାର୍ବଭୌମତ୍ବର

      ବିଶ୍ୱ ବନ୍ଧୁତାରେ

    ବଞ୍ଚିଛି ଗର୍ବେ ଗୌରବେ ।

ହେ ଭାରତବାସୀ ଶାନ୍ତିର ପ୍ରୟାସୀ

     ବ୍ୟକ୍ତିରେ ବ୍ୟକ୍ତିରେ

     ଦୂରତ୍ୱ ଭିତ୍ତିରେ ମିଶି ।

ଅଖଣ୍ଡ ଦୀପର ଆଲୋକ ଶିଖାରେ

    କୋଭିଡ୍ ମେଧ ଯଜ୍ଞେ

   ମହାମାରୀ ଦେବା ନାଶି ।

କରୋନାବର୍ଦ୍ଧକ ବିଦେଶୀ କୁକୀର୍ତ୍ତି

      ଦୀପଶିଖାନଳେ

    ଜଳିଯାଇ ହେବ ଧ୍ୱଂସ ।

ବିଭତ୍ସ କୁତ୍ସିତ କରୋନା କବଳୁ

      ମୁକ୍ତି ମଶାଲ

   ଆଣିବ ନୂଆ ବିଶ୍ୱାସ ।

ଆସ ବନ୍ଧୁ ଆସ  ସଖା ସହୋଦର

     ମୈତ୍ରୀ,ମିଳନର

    ଅପଲକ ମୁହୂର୍ତ୍ତରେ ।

ବ୍ୟକ୍ତିର ଭିତ୍ତିରେ ଗୋଷ୍ଠୀ ଦୀପ ଜାଳି

      ନୂତନ ଆଶାକୁ

   ଆଙ୍କିଦେବା ଆଲୋକରେ ।

ଏ ନୁହେଁ କବିଙ୍କ  କାଳ୍ପନିକ କାବ୍ୟ

      ଭାରତ ମାଟିର

    ଆନ୍ତରିକ ଉଦ୍ବୋଧନୀ !

ଦୀପର ଆଲୋକେ ଆଲୋକିତ କର

      ଭାରତ ମାଆକୁ

    କରି ଚିର ସ୍ୱାଭିମାନୀ !