ମାଟି ଆମର ମା

ଏ ମାଟି ଆମର ଜନ୍ମଭୂମି 

କର୍ମଭୂମି ଏଇ 

ତାହାରି କୋଳେ ଜୀବନ ଆମ 

ଉଠିଛି ପୃଷ୍ଟ ହୋଇ l

ତାହାରି ପାଣି ପବନେ ଗଢ଼ା 

ଆମ ଏ ମନ ପ୍ରାଣ 

ତାହାରି ଶାକ ତଣ୍ଡୁଳ ଖାଇ 

ଶରୀର ହେଲା ଟାଣ l

ତାହାରି ତରୁ ସବୁଜ ପତ୍ରେ 

ଭରିଛି ଅମ୍ଳଜାନ 

ତାହାରି ଫୁଲ ଫଳେ ଏ ଧରା 

ପାଇଛି ଜୀବଦାନ l

ତାହାରି ନଦୀ ସବୁଜ ବନ 

ଆନନ୍ଦ କରେ ପ୍ରାଣ 

ମନ୍ଦ ମଳୟ ବିଶୁଦ୍ଧ ବାୟୁ 

ଭରଇ ଅନୁକ୍ଷଣ l

ଋତୁଚକ୍ରର ପରିପାଟୀରେ 

ବଦଳେ ତା'ର ବେଶ 

ଏ ମାଟି ମା' ସହିଛି ସବୁ 

କରେନି କେବେ ରୋଷ l

ଏ ମାଟି କୋଳେ ଜୀବଜଗତ 

କେତେଯେ ଜନପଦ 

ସବୁଜ ବନ ପାହାଡ଼ କ୍ଷେତ 

ନଦୀ, ସାଗର, ହ୍ରଦ l

ଗଛ ଡାଳରେ ବିହଙ୍ଗ ବସି 

ମଧୁର ଗୀତ ଗାଏ 

ଏ ମାଟି ଛୁଇଁ ଦୂର ଆକାଶେ 

ନିମିଷେ ଉଡି ଯାଏ l

ଅଭୁଲା ତା'ର ସୁଷମା ରାଜି 

ଅଭୁଲା ତା'ର ଗାଥା 

ଏ ମାଟି କୋଳ ଆଶ୍ରୟ ସ୍ଥଳ 

ହରେ ସବୁରି ବ୍ୟଥା l

ତାହାରି ଧୂଳି ମଥାରେ ବୋଳି 

ଉଠ ଜଗତବାସୀ 

କର୍ମ ପଥରେ ଆଗେଇ ଚାଲ 

ପ୍ରଭାତ ହେଲା ଆସି l