ଚଉପଦୀ - କାଳିଆ କାହ୍ନୁ ଆଉ ବିଳମ୍ବ
ଚଉପଦୀ - କାଳିଆ କାହ୍ନୁ ଆଉ ବିଳମ୍ବ
କବି -ଗୌରଚରଣ ଅଧିକାରୀ
କାଳିଆ କାହ୍ନୁ
ଆଉ ବିଳମ୍ବ କର କାହିଁକି ।
ବରଷକେ ଥରେ
ବିଜୟେ ରଥରେ
ପତିତ ତାରିବା ପାଇଁକି । ଘୋଷା ।
ଚଉଦ ବ୍ରହ୍ମାଣ୍ଡ ରୁଣ୍ଡ ହୋଇଛନ୍ତି
ଦର୍ଶନ କରିବା ପାଇଁକି ।
ଅନେକ କାଳର ଦୁଃଖ ଉପେଖିବେ
କଳାଶ୍ରୀମୁଖକୁ ଚାହିଁକି । ୧ ।
ଆଗେ ଗଜପତି ଉଭାହୋଇଛନ୍ତି
ଶିରେ ଯୋଡ଼ି କର ଦୁଇକି ।
ସୁନା ଶୋଧନୀରେ ମାର୍ଜନା କରନ୍ତି
ପହଣ୍ଡି ବିଜୟେ ଭୂଇଁକି । ୨ ।
ଛତିଶା ନିଯୋଗେ ଉଭାହୋଇଛନ୍ତି
ଯେ ଭାଜନ ହେବେ ଯହିଁକି ।
ଆକାଶେ ଇନ୍ଦ୍ର ଅମରବୃନ୍ଦ ପୁଷ୍ପ
ବୃଷ୍ଟି କରୁଛନ୍ତି ତହିଁକି । ୩ ।
ତାଳଧ୍ୱଜ ରଥେ ବିଜୟ କରନ୍ତୁ
କହିଦିଅ ବଡ଼ ଭାଇଁଙ୍କି ।
ଦେବୀରଥ ବଡ଼ ସୁନ୍ଦର ଦିଶିବ
ଭଉଣୀ ହଳଦୀମୁହୀଁକି । ୪ ।
ତୁମ୍ଭେ ପଛରେ ପଛକେ ଆସୁଥାଅ
କରି ନବରଙ୍ଗ ଛଇକି ।
ମଥା ଦୋହଲାଇ ଟାହିଆ ହଲାଇ
ଠାବେ ଠାବେ ରହି ରହିକି । ୫ ।
ସେବକମାନଙ୍କ ଅଙ୍ଗ ଶ୍ରମଝାଳ
ଗମଗମ ପଡ଼େ ବହିକି ।
ଝଙ୍କାଝଙ୍କି କରିବାରୁ ବାଧୁଥିବ
ପରା ସୁକୁମାର ଦେହିକି । ୬ ।
ଦେବଦାସୀ ନାଟ ଉକୁଟ କରନ୍ତି
ତାତ ଧ୍ରିନିକିଟି ଥେଇକି ।
ବାଜେ ଖୋଳତାଳ ମହୁରୀ ମଞ୍ଜୁଳ
ମର୍ଦ୍ଦଳ ତାଧେଇ ଧେଇକି । ୭ ।
କା ନେତ୍ରୁ ଲୋତକ ବହେ ଥକଥକ
କେହୁ ନାଚେ ଗୀତ ଗାଇକି ।
ଜଗମୋହନିଆ ଜଗତଜନଙ୍କୁ
ଲଗାଇଛି ପ୍ରେମବାଇକି । ୮ ।
କେତେ ଖାଇବ କଦଳୀ କରମଙ୍ଗା
ସରପୁଳି ଖଣ୍ଡ ଖଇକି ।
ନାଡ଼ୀ ବଡ଼ି ଗଜା ମନୋହର ଖଜା
ଛେନାପୁର ବସାଦହିକି । ୯ ।
କେତେ କେତେ ଢମାଳୀ ଗୀତ ଶୁଣାଇବେ
କେ କେତେ କରିବେ ଟାହିକି ।
ଖଣ୍ଡି ଚିରଦୁଃଖ ମଣ୍ଡିଦେବ ଆଜ
କ୍ଷେତ୍ର ବଡ଼ଦାଣ୍ଡ ସାହୀକି । ୧୦ ।
ନ ଦିନ ଅବଧି ଲକ୍ଷ୍ମୀଙ୍କି ପ୍ରବୋଧି
ଆସିଅଛ ପରା କହି କି ।
ତୁନିହୋଇ ଆସ ଚିହ୍ନିଅଛଟିକି
ଜଳପତି ଜେମାଦେଈକି । ୧୧ ।
ଆହେ ଚକାଡୋଳା ବୃନ୍ଦାବନ ଲୀଳା
ମନେ ଆଉ ପଡ଼ୁ ନାହିଁ କି ।
ଆସ ବଂଶୀଧାରୀ ଚରାଇବ ପରା
ଜଗତ ଭଗତ ଗାଈଙ୍କି । ୧୨ ।
ପାପ ଅନ୍ଧକାର ଛାର କି କରିବ
ଆଉ ସେ ପାଇବ ଛୁଇଁକି ।
ନୀଳଶଇଳଶିଖରୀ ପୂର୍ଣ୍ଣଚନ୍ଦ୍ର
ଆସୁଛନ୍ତି ପରା ଉଇଁ କି । ୧୩ ।
ଅପଲକ ଦୃଷ୍ଟି କର ରେ ମାନସ
ଆଉ ଏ ସମୟ ପାଇ କି ।
ଗଉର ଚରଣ ପଶିଲା ଶରଣ
ନନ୍ଦିଘୋଷ ରଥ ଛାଇକି । ୧୪ ।