ମାତୃଭାଷା

ଗଣମାଧ୍ୟମଟା ଅଳିଆ ହେଲାଣି

ଯିଏ ଯାହା ଇଚ୍ଛା ଲେଖି ଦିଅନ୍ତି

ଭାଷା ହାତଗୋଡ ଭାଙ୍ଗିଦେଇ ତାର

ଅର୍ଥରୁ ଅନର୍ଥ କରିଦିଅନ୍ତି

ମାତୃଭାଷା ଛାଡି ଅନ୍ୟ ଭାଷାରେ ଯେ

ବଡିମା ଦେଖାଇ ଲେଖୁଥାଆନ୍ତି

ବ୍ୟାକରଣଗତ ଆଉ ବନାନରେ 

ଅନେକ ଭୁଲ୍ ଯେ କରିଥାଆନ୍ତି

ଆମେ ତ ଓଡିଆ, ଓଡିଆ ଭାଷାକୁ

ଛାଡିଦେବା ଭାଇ କୁହ କେମିତି

ଓଡିଆରେ କ'ଣ ଶବ୍ଦର ଅଭାବ

ଏମିତି କାହିଁକି ଥୋକେ କରନ୍ତି

ଓଡିଆ ଭାଷାର ଚାତୁର୍ଯ୍ୟ ଓ ଶୈଳୀ 

ଆଦୃତ ହୋଇଛି ସାରା ବିଶ୍ୱରେ

ଏ ଜାତି ମହାନ ସଂସ୍କୃତି ସମ୍ପନ୍ନ 

ମଧୁରତା ଅଛି ଆମ ଭାଷାରେ

ଚାଲ ଆମେ ଆଜି ଶପଥ କରିବା

ଲେଖିବା କହିବା ଭାଷା ଓଡିଆ

ଆହୁରି ସମୃଦ୍ଧ କରିବା ଭାଷାକୁ 

ଦେଖିବା କେମିତି ହେବ ବଢିଆ