ମାଣବସା

ଓଡ଼ିଆ ଘରର  ନିଆରା ପର୍ବ

ମାଣବସା ଗୁରୁବାର,

ମାତା ମହାଲକ୍ଷ୍ମୀ  ପୂଜିତ ହୁଅନ୍ତି

ମାର୍ଗଶିରେ ଏହି ବାର ।

ପ୍ରତି ବୁଧବାର  ଗୋମୟ ଜଳରେ

ଘର ଲିପାପୋଛା ହୁଏ,

ଅରୁଆ ଚାଉଳେ   ବାଟିଣ ପିଠଉ

ଝୋଟି ପାଇଁ ରଖାଯାଏ ।

ଦୂବ ବରକୋଳି  ପୁକଶୁଙ୍ଗା ପତ୍ର

ଗେଣ୍ଡୁଫୁଲ ଆମ୍ବଡ଼ାଳ,

ସଜ କରି ରଖେ ଗୁରୁବାର ପାଇଁ

ଉଠି ସକାଳେ ସହଳ ।

ବାସିକାମ ପରେ  ସ୍ନାନ କରି ସାରି

ଝୋଟି ଚିତା ଆଙ୍କି ଥାଏ,

ପଦ୍ମଫୁଲ ଚିତ୍ର  ଷୋହଳ ପାଖୁଡ଼ା

ଲକ୍ଷ୍ମୀପାଦ ଥାପି ଦିଏ ।

ପ୍ରବେଶ ଦ୍ଵାରରେ କରୁଥାଏ ପୂଜା

ଶଂଖ ହୁଳହୁଳି ଦିଏ,

ଆବାହନ କରେ ଲକ୍ଷ୍ମୀ ଠାକୁରାଣୀ

ମୋର ଘରେ ଆସ ମାଏ ।

ଘର ଅଗଣାରେ  ମାଣକୁ ସଜାଏ

ଶୁକ୍ଳଧାନ ଭରି ଦେଇ,

ମାଣରେ ମୁକୁଟ  ଗେଣ୍ଡୁଫୁଲ ହାର

ନାନା ଫଳ ମାନ ଥୋଇ ।

ଖିରି ଓ ଚିତଉ  ଆରିସା ଉଖୁଡା

ମଣ୍ଡାପିଠା ପଞ୍ଚାମୃତ,

ନାନାଦି ବ୍ୟଞ୍ଜନ  ରନ୍ଧା ହୋଇଥାଏ

ଦହିରେ କଡମା ଭାତ ।

ବାଳଧୂପ ଦେଇ ନୈବେଦ୍ୟ ବାଢଇ

ଚାରି ପାଳି ଗୁରୁବାର,

ପ୍ରତି ଗୁରୁବାର  ଲକ୍ଷ୍ମୀ ପୁରାଣକୁ

ପଢୁଥାଏ ବରାବର ।