Library
ମାଣବସା ଗୁରୁବାର
ମାଣବସା ଗୁରୁବାର
ମାଣବସା ଗୁରୁବାର, ମହାଲକ୍ଷ୍ମୀଙ୍କର ପରବ ସାର ଗୋ
ଝୋଟି ଚିତା ପକା ଘରଦ୍ୱାର, ସଜନୀ ଗୋ |
ମାସ ଶ୍ରେଷ୍ଠ ମାର୍ଗଶିର, ସ୍ୱୟଂ ଅନ୍ନପୂର୍ଣ୍ଣା ବିଜେ ମହୀର ଗୋ
ସ୍ଵର୍ଣ୍ଣ କୁମ୍ଭ ଧରି କକ୍ଷପର, ସଜନୀ ଗୋ ।
ଧନ ଧାନ୍ୟ ପୂର୍ଣ୍ଣ ଧରା, ମୁଖେ ମୁଖେ ଭରା ହସ ପସରା ଗୋ
ଶୀତ ଋତୁ ଆଦ୍ୟ ସ୍ପର୍ଶ ପରା, ସଜନୀ ଗୋ |
ପଡ଼ି଼ଦାତ୍ରୀ ଜଗଦ୍ଧାତ୍ରୀ, ଶ୍ରୀମତୀ ଶ୍ରୀପତି ଅଙ୍କ ସମ୍ପତ୍ତି ଗୋ
ରୂପେ ହାରିଯିବେ କୋଟି ରତି, ସଜନୀ ଗୋ |
ରତ୍ନାକର ଯାର ତାତ, ସୁଧାକର ଚନ୍ଦ୍ର ଯାହାର ଭ୍ରାତ ଗୋ
ପୟ ପୟୋଧି ମନ୍ଥନୁ ଜାତ, ସଜନୀ ଗୋ |
ନୀଳ କନ୍ଦର ଶୋଭିନୀ, ବ୍ରହ୍ମଦାରୁ ହରି ଚିତ୍ତ ମୋହିନୀ ଗୋ
ନିତ୍ୟ ନବ ନବ ଅଭିସାରୀ, ସଜନୀ ଗୋ |
ଶ୍ରୀୟା ଚଣ୍ଡାଳୁଣୀ ଘର, ବୁଲି ଯାଇଥିଲେ ପାଇ ଖବର ଗୋ
ପତି ଦେଢଶୁରେ ହତାଦର, ସଜନୀ ଗୋ |
ବଡ଼ ଦେଉଳୁ ବାହାର, କରିଦ୍ୟନ୍ତେ ସତୀ କୋପେ ଜର୍ଜର ଗୋ
ଯାଇ ସିନ୍ଧୁକୂଳେ କଲେ ଘର, ସଜନୀ ଗୋ |
ଲକ୍ଷ୍ମୀଛଡା ହଳି ହରି, ସକଳ ସମ୍ପଦ ନେଲେ ମା ହରି ଗୋ
ବେନି ଭାଇ ଭିକ୍ଷାଥାଳ ଧରି, ସଜନୀ ଗୋ |
ମିଳିଲାନି ଅନ୍ନ ଜଳ, କ୍ଷୁଧା ପିପାସାରେ ହୋଇ ବିକଳ ଗୋ
ଭୋଗି ହିନସ୍ଥା ଭ୍ରାତା ଯୁଗଳ, ସଜନୀ ଗୋ |
ଦୁର୍ବଳୁ ଦୁର୍ବଳତର, ଉପବାସେ ରହି ବାର ବର୍ଷର ଗୋ
ଯାଇ ସିନ୍ଧୁ କୂଳରେ ହାଜର, ସଜନୀ ଗୋ |
ମାଗନ୍ତେ ଅନ୍ନ ଶ୍ରୀଧର, ଦାସୀ ବୋଲେ ଏ ଚଣ୍ଡାଳୁଣୀ ଘର ଗୋ
ଖାଉ ଜାତି ଯିବ ଦୁହିଁଙ୍କର, ସଜନୀ ଗୋ |
ପ୍ରାଣ ତ ହେବ ଅନ୍ତର , ପରସ ଅନ୍ନ ବ୍ୟଞ୍ଜନ ସତ୍ୱର ଗୋ
ଜାତି କଥା ମନୁ ପରିହର, ସଜନୀ ଗୋ |
ଜାଣିଲେ ଜଗତ ନାଥ, ଲକ୍ଷ୍ମୀଙ୍କ ରାନ୍ଧଣା ଏତ ବିଖ୍ୟାତ ଗୋ
ଖାଦ୍ୟ ଶେଷେ ପୋଡ଼ ପିଠା ପ୍ରାପ୍ତ, ସଜନୀ ଗୋ |
କ୍ଷମା ମାଗି ବେନି ଭାଇ,ଲକ୍ଷ୍ମୀ ହସ୍ତ ଧରି ଜଗତ ସାଇଁ ଗୋ
ବଡ଼ ଦେଉଳେ ମିଳିଲେ ଯାଇ, ସଜନୀ ଗୋ |
ବେଦବର ଇନ୍ଦ୍ର ହର, ପରିଚର ଯାର ସର୍ବ ଅମର ଗୋ
ସ୍ତୁତି କରନ୍ତି ସଚରାଚର, ସଜନୀ ଗୋ |
ମାଣବସା କୁ ସୁଦଶା, ବେନି ବ୍ରତ ଲକ୍ଷ୍ମୀଙ୍କର ସରସା ଗୋ
ଦୂର କରେ ଦାରିଦ୍ର୍ୟ ଦୁର୍ଦ୍ଦଶା, ସଜନୀ ଗୋ |
ଜୟ ଜୟ ମହାଲକ୍ଷ୍ମୀ, ଐଶ୍ଵର୍ଯ୍ୟ ମାଧୁର୍ଯ୍ୟ ଦିବ୍ୟ ଶକତି ଗୋ
ଜଗା ଶ୍ରୀପଦେ କରେ ବିନତି, ସଜନୀ ଗୋ |
