ମାଆ ନୁହେଁ କେବେ କୁମାରୀ

କୁଆଁରୀ ମାଆର ପରିଚୟ ପାଇ 

   ମନ ହୁଏ ଆନ୍ଦୋଳିତ 

ମାନସ ପଟଳେ ଖୋଜଇ ନିଜକୁ 

   ଦୁଃଖେ ହୋଇ ପରାହତ ll

ପୁରୁଷ ବିହୁନେ ସମ୍ଭବ କେବେକି

    ମାତୃତ୍ୱର ରୂପ ରେଖା

କାମିନୀ କାମନା ପୁରୁଷ ହରିଲେ 

    କୁମାରୀତ୍ୱ ହୁଏ ପଖା ll

ମିଛ ଅପବାଦ କାହିଁ ଲାଗେ ସତେ 

    ମାଆର ନାମକୁ ନେଇ 

ବିଜ୍ଞତା ଭାଷାରେ ମିଥ୍ୟା ଭୂଷଣରେ 

    ଲଜ୍ଜା ଘରେ ଜଳେ ଯୂଇ ll

କୁମାରୀ ହରଣ ଶ୍ରୀମତୀ ଧାରଣ 

   ପୁରୁଷ ଚରିତ୍ର ଲାଗି 

କୁଆଁରୀ ମାଆର ମିଥ୍ୟା ଆଭୂଷଣ 

    ସମାଜ ସମ୍ମୁଖେ ଦାଗୀ ll

ମାଆ ନୁହେଁ କେବେ କୁମାରୀ ଚରିତ୍ର 

    ମନେ ମନେ ଥରେ ହେଜ

ପୁରୁଷ ପ୍ରମାଣ  ପ୍ରକୃତି ଧାରଣ 

    ନିଜ ଦୋଷ ନିଜ ଧ୍ଵଜ ll