ମା ମଙ୍ଗଳା

ଜୟ ଶିବଜାୟା ଜୟ ମହାମାୟା

ନାମ ବହିଛୁ ମଙ୍ଗଳା,

ମଙ୍ଗଳକାରିଣୀ ଅଟୁ ତୁ ମା' ଲୋ

ରଖୁ ତୁ ବୁଡିଲା ଭେଳା ।

କାକଟପୁରର ଅଧିଷ୍ଠାତ୍ରୀ ତୁହି

ଅଟୁ କେନ୍ଦୁଚାର ପ୍ରିୟ,

ମଙ୍ଗଳବାରରେ ପୂଜିଲେ ମା' ଲୋ

ହେଉ ତୁ ସଦା ସଦୟ ।

ଭୋଦୁଅ ମାସରେ ଖୁଦୁରୁକୁଣୀ ତୁ

ପୂଜାକଲା ତଅପୋଈ,

ସାହା ହେଲୁ ମା' ଦୁଃଖ ତା' ସରିଲା

ଫେରିଲେ ତା' ସାତଭାଇ।

ଆଶ୍ବିନ ମାସର ମଙ୍ଗଳବାରରେ

ନିଶି ରେ ତୋହର ପୂଜା,

ଖୁଲଣା ସୁନ୍ଦରୀ ମାନ ତୁ ରଖିଲୁ

ଉଡିଲା ବିଜୟ ଧ୍ବଜା ।

ଚୈତ୍ର ମାସର ମଙ୍ଗଳବାରରେ

ଚଣ୍ତାଳୁଣୀ ପୂଜା କଲା,

ଧନ ଧାନ୍ଯ ଆଉ ସନ୍ତାନ ପାଇଣ

ସୁଖରେ କାଳ କାଟିଲା ।

ଅବର୍ଣ୍ଣନୀୟ ମା ମହିମା ତୋହର

କିଞ୍ଚିତ ବର୍ଣ୍ଣିଲି ମୁହିଁ ,

ତ୍ରୁଟି ଥିଲେ ମା' କରିବୁ ମାର୍ଜନା

ସାହା ହେବୁ ମା' ତୁହି ।

ଅଭୟଦାୟିନୀ ଜଗତଜନନୀ

ଅଟୁ ମା' ତୁ ବରଦା,

ଭକତର ଦୁଃଖ ମୋଚନ ପାଇଁକି

ଜାଗ୍ରତ ଥାଉ ତୁ ସଦା ।

କରଇ ମା' ଅଳି କରଦ୍ବୟ ତୋଳି

ସାହା ହେବୁ ଜଗତକୁ,

ସବୁରି ଜୀବନେ ସୁଖ ଦୀପ ଜାଳି

ଦୁଃଖ ନିଶି ମା' ନାଶିବୁ ।