ପାଦର ପାଉଁଜି

ବର୍ଣ୍ଣେ ବିଭାବରୀ ତୁହି ଲୋ ସୁନ୍ଦରୀ

କୁଶେଶୟ ପ୍ରାୟ ପାଦ,

ପାଦ ଯୁଗଳେ ତୋ ଶୋଭିତ ପାଉଁଜି

ମୁଗ୍ଧ କରେ ତା'ର ନାଦ । (୧)

ଅଲକ୍ତ ବର୍ଣ୍ଣର ପାଦ ଯେ ତୋହର

ପାଉଁଜି ଶୋହେ ସେଥିରେ,

ସେହି ପାଉଁଜିର ଲଳିତ ସ୍ବର ଯେ

ମତୁଆଲା ମୋତେ କରେ । (୨)

ଶୁଭେ ରୁଣୁଝୁଣୁ ତୋ ପାଉଁଜି ବେଣୁ

ମନ ପୁଲକିତ ହୁଏ,

ସେ ରୁଣୁଝୁଣୁରେ ପଞ୍ଚମ ରାଗିଣୀ

ମନେ ଗୁଣୁଗୁଣୁ ଗାଏ । (୩)

ଶୟନ କାଳରେ ସପନେ ଦେଖଇ

ଆସୁଅଛୁ ତୁହି ମିତ,

ପାଦର ପାଉଁଜି ତୋଳଇ ମୂର୍ଚ୍ଛନା

ସପ୍ତସୁରେ ଗାଏ ଗୀତ । (୪)

ସୁନା ପାଦରେ ତୋ ରୂପାର ପାଉଁଜି

ଦିଶେ କେଡେ ମନଲୋଭା,

ଅତୁଳନୀୟ ଯେ, ସେ ଶୋଭା ଅଟଇ

କିବା ପଟାନ୍ତର ଦେବା । (୫)