ମା ବୀଣାପାଣି ସ୍ତୁତି
ମା ବୀଣାପାଣି ସ୍ତୁତି
ଜୟ ହଂସପତ୍ରା ହଂସପତ୍ରାପତ୍ୟା
ହଂସ ପ୍ରାଣ ପ୍ରଣୟିନୀ
ଶ୍ୱେତ ପଦ୍ମାସନା ବିଶାଳ ଲୋଚନା
ଜ୍ଞାନ ନେତ୍ର ପ୍ରଦାୟିନୀ |
ପ୍ରକୃତି ରୂପିଣୀ ବିଶ୍ୱ ବିମୋହିନୀ
ଯୋଗମାୟା ସ୍ୱରୂପିଣୀ
ପୁସ୍ତକ ଧାରିଣୀ ବୀଣା ବିନୋଦିନୀ
ନିତ୍ୟ ସ୍ଥଳ ନିବାସିନୀ |
ମା ବାକବାଦିନୀ ତୁଣ୍ଡ ତାଣ୍ଡବିନୀ
କାବ୍ୟ କଳା ବିଳାସିନୀ
ଶ୍ବେତ ବସ୍ତ୍ରାବୃତ୍ତା ଦିବ୍ୟ ଅଳଙ୍କୃତା
ଶାରଦା ବରଦାୟିନୀ |
କର୍ଣ୍ଣରେ କୁଣ୍ଡଳ ମଣ୍ଡେ ଗଣ୍ଡ ସ୍ଥଳ
ମୁକ୍ତା ହାର ବିମଣ୍ଡିନୀ
ପୟରେ ନୂପୁର କିଙ୍କିଣୀ କେୟୂର
ରୁଣୁ ଝୁଣୁ ନିକ୍ୱଣିନୀ |
ବୁଦ୍ଧି ସିଦ୍ଧି ଧାତ୍ରୀ ମାତ ବିଦ୍ୟା ଦାତ୍ରୀ
ବାଣୀରାଣୀ ବିଧାୟିନୀ
ପରମ ବୈଷ୍ଣବୀ କୋଟି ରବି ଛବି
ଦେବୀ ତ୍ରିଲୋକ ପାଳିନୀ |
ଧାତା ହରି ହର ଦେବ ପୁରନ୍ଦର
ଯାହାର ଅନୁବର୍ତ୍ତିନୀ
ତ୍ରିଦଶ ବନ୍ଦିତା ଜଗଜ୍ଜନ ହିତା
ଚରାଚର ସଂପୂଜିନୀ |
ମହା ସରସ୍ୱତୀ ସିନ୍ଧୁଜା ସପତ୍ନୀ
ବିଷ୍ଣୁ ନିଦ୍ରା ବିଭଞ୍ଜିନୀ
ଦେବୀ ଭଗବତୀ ସାରସ୍ୱତ ମତି
ବୁଧ ବୋଧ ପ୍ରଦାୟିନୀ |
ବାଲମୀକ ବ୍ୟାସ କବି କାଳିଦାସ
କବି କୁଳ ଗୁରୁ ତିନି
ଭଞ୍ଜ ରାଧାନାଥ ଯୁଗ ସ୍ରଷ୍ଟା ଖ୍ୟାତ
ହେଲୁ କୃପା ନିସ୍ୟନ୍ଦିନୀ |
ଦେବୀ ମନସ୍ବିନୀ ମାନସ ଲାସ୍ୟନୀ
ନିଗମ ଜ୍ଞାନ ବାହିନୀ
ମୂର୍ଖକୁ ଜ୍ଞାନୀଶ ମୂକକୁ ବାଗୀଶ
କରୁ ମା ପ୍ରତିପାଦିନୀ |
ଝଙ୍କଡ଼ ସଦନୀ ସାହିତ୍ୟ ଜନନୀ
ଘେନ ମୋହର ଦୟିନୀ
ଫୁଟାଅ ଉତ୍କଳ ଭାରତୀ କମଳ
ସାଜି କୃପାଂଶୁ ବର୍ଷିଣୀ ।