ଲୁହ ନଈ
ଲୁହ ନଈ
ସଂସାର ସାଗରେ ମୋତେ ପଠାଇଲ
ସବୁ କିଛି ଦେଇ କରି
ନାଉରୀ ର କଳା କାତର ଆହୁଲା
କଥା କାନେ ଥିଲ କହି ।
ଆହୁଲା ମାରିବା ନାଉରୀ ର କଳା
ସବୁ ମୁଁ ଯେ ଭୁଲି ଗଲି
ଲୁହର ନଈରେ ପହଁରି ପହଁରି
ଅଣ ନିଃଶ୍ଵାସୀ ହୋଇଲି ।
ମଣିଷ ଜନ୍ମର ଉଦ୍ଦେଶ୍ୟ ଭୁଲିଲି
ମାୟାରେ ମୁଁ ହଜି ଗଲି
ମୋ ପାଖରେ ଥିଲା ଶାନ୍ତିର ଠିକଣା
ଏଣେ ତେଣେ ଖୋଜୁଥିଲି ।
ସଂପର୍କ ଅର୍ଥକୁ ବି ଅର୍ଥ କରି ମୁଁ
ଲୁହ ନଈ ବୁହାଇଲି
ସେ ନଈ କୂଳରେ ଠିଆ ହୋଇ ଦେଖେ
ଏକଲା ମୁଁ ହୋଇଗଲି ।
ସମ୍ପର୍କ ମାନଙ୍କ ଛନ୍ଦା ଛନ୍ଦି ସଂଜ୍ଞା
ଲୁହର ବରଷା କଲା
ତୁମକୁ ଭୁଲି ମୁଁ ଆତ୍ମ ଗର୍ବେ ହଜି
ଚେଷ୍ଟା କରି ମୁଁ ଚାଲିଲି ।
ବୁନ୍ଦା ବୁନ୍ଦା ଲୁହ ଏକାଠି ହୋଇଲା
ନଈ ହୋଇ ବହିଗଲା
ସେ ନଈରେ ଆଜି ପହଁରୁଛି ଏକା
ରକ୍ଷା କର ପରମାତ୍ମା ।
ହାତ ଧରି ପ୍ରଭୁ ଲୁହର ନଈକୁ
ପାରି ତ କରାଇ ଦିଅ
ତୁମ ଅନୁଭବେ ମଜ୍ଜାଇ ଦିଅ ହେ
କାତ ଧରା ହେ ଶିଖାଅ ।
ତୁମ ଅନୁଭବେ ଲୁହର ନଈରେ
ପରମାନନ୍ଦ ପାଇବି
ଲୁହ ଓ ହସର ମାନେ ନ ରହିବ
ସମ ଭାବାପନ୍ନ ହେବି ।
ଲୁହର ନଈ ବା ହସର ବଗିଚା
ସବୁ ଆମ କର୍ମେ ଗଢ଼ା
ସୁକର୍ମ ପାଇଁ କି ପ୍ରେରିତ କର ହେ
ତୁମେ ତ ପରମ ପିତା ।