ଲୋଡୁଛି ଦିବ୍ୟ ଦର୍ଶନ

ଦରଶନ ତୋର କରିବି ବୋଲିରେ

ଗଣି ଚାଲିଛି ମୁଁ ଦିନ

ତୋ ଡୋରୀ ଲାଗିଲେ ଶ୍ରୀକ୍ଷେତ୍ର ଯାଇ ମୁଁ

ଦେଖିବି କଳା ବଦନ I

ଧିରେ ଧିରେ ମୋର ବୟସ ଖସୁଛି

ଦେହରୁ ଖସୁଛି ବଳ

ଅଣ୍ଟା ନଇଁଲାଣି ଆଖିକୁ ଦିଶୁନି

ସରି ଆସିଲାଣି ବେଳ I

ତୋ ମହିମା କେତେ ଶୁଣିଛି କାଳିଆ

ଆଖିରେ ଦେଖିନି ତୋତେ

ଅବଢା ଟିକିଏ ତୁଣ୍ଡରେ ଦେଇନି

ପ୍ରଣମିନି ଯୋଡ ହସ୍ତେ I

ଆଖି ବନ୍ଦକରି ଅନୁଭବିଛି ମୁଁ

ମୋ ଭିତରେ ତୋର ସତ୍ତା

ତୋର ଦରଶନ ଲୋଡେ ମୋର ମନ

ଆଉ ସବୁ ଲାଗେ ପିତା I

ଭାବନାରେ ତୋର କଟୁଛି ମୋ ଦିନ

ଜାଣିନୁ କି ଭାବଗ୍ରାହୀ

ମୋ ଭିତରେ ରହି ବାଟ ଦେଖାଇବୁ

ପାରିହେବି ଭବନଈ I

ପପୀଟିଏ ବୋଲି ରାଗିବୁ ନାହିଁରେ

କୋପେ ଦେବୁନାହିଁ ଶାପ

ଦିବ୍ୟ ଦରଶନ ପାଇଗଲେ ତୋର

ପୂର୍ଣ୍ଣ ହେବ ଅଭିଳାଷ I