ଲୋଡା ନାହିଁ ପ୍ରଭୁ

ଲୋଡା ନାହିଁ ପ୍ରଭୁ ଧନ ମାନ ଯଶ

ଅବା କାମ ମୋକ୍ଷ ଗତି

ତୁମ ରାମ -କୃଷ୍ଣ ନାମ ଭଜୁଥିବି

ରଖି ତୁମ ପାଦେ ମତି

ତୁମ ଲୀଳାମୃତ ଶୁଣି ଶୁଣି ମୁହିଁ

ଭକ୍ତିଭୋଳେ ହୋଇ ମଗ୍ନ

 ତୁମ ଧାମେ ରହି ତୁମ ସେବା ରେ ମୁଁ

ରତ ଥିବି ରାତି ଦିନ

ଖାଉଥିବି ତୁମ ପ୍ରସାଦ ନିରତେ

ପିଉଥିବି ପାଦୋଦକ

ଦେଖୁଥିବି ତୁମ ମଙ୍ଗଳ ଆରତୀ

ପୂଜି ମୋ ଜୀବନ ଯାକ

ନାମ ଭଜି ଭୁଲି ଏ ସାରା ସଂସାର

ଭକ୍ତି ଅଥଳ ସାଗରେ

ବୁଡି ବୁଡି ଦିନେ ପ୍ରାଣ ଦେବି ଛାଡ଼ି

ଆଉ କିବା ଲୋଡା ମୋରେ

ନ ଗ୍ରାସୁ ଏ ମାୟା ମୋହ ଜଗନ୍ନାଥ

ଏତିକି କରୁଣା ହେଉ

ପଦ୍ମ ପତ୍ରେ ଜଳ ପରି ଢଳ ଢଳ

ଭକ୍ତି ମୋର ସ୍ୱଛ ଥାଉ