ଲୋଡ଼ା ଖାଲି ଟିକେ ହସ

ରାତି ପାହିଗଲେ ସୁରୁଜ କିରଣ

ବିଞ୍ଚି ହୋଇଯିବା ପରି

ଶୁଖିଲା ମୁହଁରେ ଖେଳିଗଲେ ହସ

ଖୁସିରେ ଉଠଇ ପୂରି l

ଘୁଞ୍ଚେ ଅବସାଦ ହସର ଜୁଆରେ

ମହକି ଉଠେ ଜୀବନ

ଫୁଟିଲା ଫୁଲର ଅଗଣା ଯେପରି

ଆନନ୍ଦିତ କରେ ମନ l

ହସ ହସ ମୁହଁ ଦେଖିବା ଲୋକକୁ

ଲାଗେ ସିନା ଆପଣାର

ବନ୍ଧୁ ସମ୍ଭାଷଣେ ନ ଆସିଲେ ହସ

ଛିଡେ ସମ୍ପର୍କର ଡୋର l

ଶୁଷ୍କ ତରୁ ଯେତେ ହୁଏ ପଲ୍ଲବିତ

ପାଇଲେ ଜଳ ପରଶ

ନୀରସ ଜୀବନ ଲାଗଇ ସରସ

ଦେଖି ଓଠ ଧାରେ ହସ l

ଦୁଇଟି ହୃଦୟ ଯୋଡ଼ିବାର ପାଇଁ

ଲୋଡ଼ା ଖାଲି ଟିକେ ହସ

ଆପଣାର ଲାଗେ ଏ ସାରା ଦୁନିଆ

ଢାଳିଦିଏ ସେ ପୀୟୁଷ l