ଲେଖା ପଛର ପ୍ରେରଣା

କଲମ ମୁନର କ୍ରିୟାଶକ୍ତି ତୁମେ 

ଲେଖିବା ପଛର ଆଦ୍ୟ ପ୍ରେରଣା 

କେତେ କେତେ ତଥ୍ୟ ଯୋଗାଇ ଦେଇଣ 

ପୂର୍ଣ୍ଣ କରିଅଛ ସୃଷ୍ଟି ଅଗଣା 

ତୁମେ ଅପୂର୍ବ ବର୍ଣ୍ଣନା 

ଜଡ଼ ଦେହେ ତୁମେ ଜୀବନର ସ୍ପର୍ଶ

ନୀରବ କଲମେ ନୂଆ ରଚନା।

ତୁମେ ତ ସୃଷ୍ଟିର ସ୍ୱର୍ଣ୍ଣିମ ସ୍ଵାକ୍ଷର 

ପ୍ରତିଟି ପ୍ରାନ୍ତରେ ତଵ ଆଶିଷ 

ମୁଖରିତ ଧରା ଗାଇ ତଵ ଗୁଣ 

ଆନନ୍ଦିତ ହୁଏ ରାତ୍ରି ଦିବସ 

ତୁମେ ଅଦମ୍ୟ ପ୍ରୟାସ 

ପରମା ପ୍ରକୃତି ପୁରୁଷର ଶକ୍ତି 

ପ୍ରାଣେ ପ୍ରାଣେ ତୁମେ ପୂତ ପ୍ରଶ୍ୱାସ ।

ତୁମ କରୁଣାରେ ପଙ୍ଗୁ ଚଢେ ଗିରି 

 ମୂକ ପଢି ପାରେ ବେଦ ପୁରାଣ 

ସକଳ ସୃଷ୍ଟିର ତୁମେ ତ ଆଧାର 

ପଲକରେ କର ନବ ନିର୍ମାଣ 

ତୁମେ ସତ୍ୟ ଚିରନ୍ତନ 

ମୋ ଜଡ଼ ଲେଖନୀ ତୁମ ପ୍ରେରଣାରେ 

ନିମିଷକେ ପୁଣି ହୁଏ ଚେତନ।