ଲାଗିଛି ଡୋରୀ ଯିବା ପୁରୀ

ଶିରୀକ୍ଷେତ୍ର ଧାମ ଡାକିଲାଣି ସଖୀ

ଲାଗିଛି କାଳିଆ ଡୋରୀ

ତା ଡାକରା ବିନା କେହି କଣ କେବେ

ଯାଇ ପାରିଲାଣି ପୁରୀ ।

ହଳଦୀ ରଙ୍ଗର ପାଟଶାଢୀ ଟିଏ

ବେଗି ବେଗି ଦେ' ପିନ୍ଧି

ପାଟ କାନିରେ ତୁ ନିର୍ମାଲ୍ୟ କଣିକା

ଯତନେ ଦେଇଥା ବାନ୍ଧି I

ଧୋବ ଧୋତି ଆଉ ଓତା ଯୋଡଟିଏ

କାଢିଦେ ପେଡିରୁ ତୋର

ତାକୁ ପିନ୍ଧିଦେଇ ଖୁସି ମନେ ସଖୀ

ଯିବି ମୁଁ କାଳିଆ ଘର I

ଆମରି ଗଛର ନଡିଆ ଗୋଟିଏ

କାଳିଆ ପାଇଁକି ନେବୁ

ଘର ଗାଈ ଘିଅ ନେଇଥିବୁ ଟିକେ

ଘିଅ ଦୀପ ଜଳାଇବୁ I

ବାଟଚଲା କ୍ଳାନ୍ତି ବାଧିବନି ଜମା

ଚାଲୁଥିଲେ ଥିରି ଥିରି

ତା ନାମ ସୁମରି ବାଟଯିବ ସରି

ପହଞ୍ଚିବା ଆମେ ପୁରୀ I

କଳା ଶ୍ରୀମୁଖକୁ ଦର୍ଶନ କରିବା

କିଛି ତୁ ମାଗିବୁ ନାହିଁ

ସବୁ ମିଳିଯିବ ଯଦି ସେ ଟିକିଏ

କୃପାନେତ୍ରେ ଦେବ ଚାହିଁ I