କ୍ୟାନଭାସ ର ଛବି

ମୋ ଆଖି ଆଗରେ କ୍ୟାନଭାସଟା

ଜଳୁଥାଏ ରଙ୍ଗରେ ହୁତୁହୁତୁ ହେଇ ,

ଯେମିତି ବାହାରି ଆସିବ ସମସ୍ତ ରଙ୍ଗ 

ଏକ ଜୀବନ୍ତ ରୂପ ନେଇ II


ପରସ୍ତ  ପରସ୍ତ ବୋଳି ହୋଇଥାନ୍ତି ରଙ୍ଗ

ଜଣଙ୍କ ସହିତ ଜଣେ 

ଛନ୍ଦି ହୋଇଥାନ୍ତି ସମସ୍ତ ରେଖା 

କ୍ଷେତ ଭିତରେ ଗଜରୀ ଉଠେ 

ସମସ୍ତ ସୃଷ୍ଟି ,

କ୍ୟାନଭାସ ଉପରେ ରଙ୍ଗର ସଂଭାର 

ତ ଆରମ୍ଭ ହେଇଯାଇଛି 

କିନ୍ତୁ ଚାଲିଛି ଏଠି ଅନନ୍ତ 

ପ୍ରୟାସର ଅଥକ ବୃଷ୍ଟି II

ଦୂରରୁ ଦେଖାଯାଉଥାଏ 

ସେ ରକ୍ତ ପଳାଶ

ଯାହା ସଦ୍ୟ ପ୍ରସ୍ଫୁଟିତ ,

କ୍ୟାନଭାସର ଖେଳି ଅଥଚ 

ସୁଦୂର ପ୍ରସରି ଦିଗଳୟରୁ 

ଆଉ ଯାହାର ସୁଗନ୍ଧ ପ୍ରସାରିଯାଏ 

ଭୂମିରୁ ଆକାଶ ପର୍ଯ୍ୟନ୍ତ II