କୁଆଡେ ଗଲା ସେ ଦିନ
କୁଆଡେ ଗଲା ସେ ଦିନ
ଆଗ ଭଳି ଆଉ ଶୀତ ପଡୁନାହିଁ
ଜଳୁନି ଉହ୍ମେଇ ନିଆଁ
ବରଷା ଆସୁନି ଆଷାଢ ଶ୍ରାବଣେ
ମାଟି ଫାଟି କରେ ଆଁ ।
ଫଗୁଣରେ ଆଉ ବସନ୍ତ ବହୁନି
କୋଇଲି ଗାଉନି ଗୀତ
ପୁଚ୍ଛ ଟେକି ଆଉ ମନ ଆନନ୍ଦରେ
କେକି ଯେ କରୁନି ନାଚ ।
ବରଷା କାଳରେ ଆଉ ଉଡୁନାହିଁ
ଝରିପୋକ ମାଳ ମାଳ
ଝିଟିପିଟି ଜମା ଚାହିଁ ବସୁନାହିଁ
ପାଟିରୁ ଗଡାଇ ଲାଳ। ।
ସାଧବବୋହୁ ତ ଆଉ ଦିଶୁନାହିଁ
ପଡୁ ନାହିଁ ଇନ୍ଦ୍ର ଧନୁ
ଦିନକୁ ଦିନ ତ ସେନହ ଶରଧା
ଉଭେଇ ଗଲାଣି ମନୁ ।
ଢୋଲ ଭେରୀ ତୂରୀ କାହାଳି ମହୁରୀ
ଦେଖିବାକୁ ମିଳୁନାହିଁ
ଆଗଭଳି ଆଉ ଢିଙ୍କି କୁଟା ମାଡ଼
ଢିଙ୍କିଶାଳେ ଶୁଭୁନାହିଁ। ।
ଗାଈଆଳ ପିଲା ଆଉ ଯାଉନାହିଁ
ନେଇ ଦୂରେ ଗାଈଗୋଠ
ଗୋଧୂଳି ବେଳାରେ ଶୁଭୁନାହିଁ ପୁଣି
ହମ୍ବାରଡି ଗାଆଁ ଯାକ ।
ଗାଆଁକୁ ତ ଆଉ ଆସୁନାହିଁ ବୁଲି
ସେଇ ଚକୁଳିଆ ଯୋଗୀ
ଗୀତା ଭାଗବତ ହେଲାଣି ଅଲୋଡ଼ା
ଶିରିହୀନ ଆଜି ଟୁଙ୍ଗୀ ।
କାଳର କରାଳ ଗରଭେ ଲୁଚିଲା
ସେଇ ଅତୀତର ଚିହ୍ନ
ଯେତେ ଖୋଜିଲେ କି ଆଉ ସେ ମିଳିବ
କୁଆଡେ ଗଲା ସେ ଦିନ ।
ପ୍ରକାଶ କୁମାର ଚାନ୍ଦ
ଜୟପୁର ଶାସନ ପିପିଲି ପୁରୀ
୯୮୫୩୩୫୪୯୩୮.୭୦୦୮୯୨୫୯୫୪