କଥାଟିଏ ଶୁଣ

କଥାଟିଏ ପିଲେ ଶୁଣ, ଦେଇ ଟିକେ ମନ ଧ୍ୟାନ

ନଷ୍ଟ ନ କରି ସମୟ., ଆହରଣ କର ଜ୍ଞାନ ॥

ହୋଇଲେ ବଡ ମଣିଷ, ଅରଜିବ କିର୍ତ୍ତୀ ଯଶ 

ଗଢି ତୋଳିବ ଜୀବନ, ଭରିବ ହର୍ଷ ଉଲ୍ଲାସ ॥

ଅନ୍ୟକୁ ସାହାଯ୍ଯ କର, ଛାଡି ଗର୍ବ ଅହଙ୍କାର

ହୃଦୟ ନିର୍ମଳ ହେଲେ, ଚରିତ୍ର ହେବ ସୁନ୍ଦର ॥

ଗୁରୁଙ୍କୁ ସମ୍ମାନ ଦିଅ, ସାନକୁ କରିଣ ସ୍ନେହ

କାହାକୁ ବି ଭାବି ଛୋଟ, କରିବନି କେବେ ହେୟ ॥

ନିତି କରିଲେ ଜଣାଣ, ପ୍ରଭୁଙ୍କ ନାମ ସ୍ମରଣ 

ଲାଭ ହେବ ଆଶୀର୍ବାଦ, ଦୂର ହୋଇବ କଷଣ ॥

ବୃକ୍ଷ ଲତା ଯତ୍ନ ନେବ, ନିୟମିତ ପାଣି ଦେବ 

ଗଛ କୁ ନ ବଞ୍ଚାଇଲେ, କିଏ ଅମ୍ଳଜାନ ଦେବ? 

ବଗିଚାର ଫୁଲ ପରି, ଜଗତେ ଭର ମହକ 

ସଭିଙ୍କୁ ଆଦର କରି, ସବୁଠାରେ ନାମ ରଖ ॥

ସତ୍ୟ ପଥେ ଚାଲ ସଦା, ହୁଅ ନାହିଁ ପଥଭ୍ରଷ୍ଟ 

ନୀତି ନିୟମ ମାନିଲେ, ପାଖ ନ ମାଡ଼ିବ କଷ୍ଟ ॥

ହୋଇବ ମଧୁର ଭାଷୀ, ଉତ୍ତରଟି ଦେବ ହସି 

ରାଗ ଗର ଗର ହେଲେ, ଭଲ ଗୁଣ ଯିବ ଭାସି ॥

ଦରିଦ୍ର କୁ ଦାନ କଲେ, ଲଭିବ ରେ ପୁଣ୍ଯ ପିଲେ 

ହେବ ଦିନେ ଅସହାୟ, ଦେବା ପାଇଁ କୁଣ୍ଠା କଲେ ॥