କ୍ଷୀରାବ୍ଧି ତନୟା ଲୋକଜନନୀ

  

ମାର୍ଗଶୀର ମାସ ହେମ ଶିଶିର l

    କମଳା ତେଜିଲେ ବୈକୁଣ୍ଠ ପୁର ll

ଆକାଶରେ ମୃଗଶୀରା ନକ୍ଷତ୍ର l

      ମାଆ ବୁଲି ଯିବେ ମରତପୁର ll

ଗୋଟି ଗୋଟି ସର୍ଷପ ଫୁଲ ଫୁଟି l

    ଘରେ ଘରେ ପଡ଼ିଛି ଚିତାଝୋଟି ll

ମର୍ତ୍ତ୍ୟେ ହୁଳହୁଳି, ଢ଼ୋଲ, ମହୁରୀ l

     କମଳାଙ୍କୁ ଡାକି ବୋଲନ୍ତି ହରି ll

କେଣେ ବାହାରିଲ ହେ ପ୍ରାଣପ୍ରିୟl l

  ମରତେ ପୂଜା ମୋ ବୋଲନ୍ତି ମାଆ ll

ମାର୍ଗଶୀର ମାସ ମାସ ମୋହରି l

     ଅନୁମତି ଦେଲେ ଯିବି ବାହାରି ll

ଦିବ୍ୟ ଧାମୁଁ ପେଚା ବାହନେ ଚଢ଼ି l

   ମାଆ ଆସିଲେ ମରତେ ଉଡି଼ଉଡି଼ ll

ବଳରାମ ଦାସ ଲକ୍ଷ୍ମୀ ପୁରାଣ l

    ଘରେ ଘରେ ହେଉଅଛି ଗାୟନ ll

ଗୁରୁବାରେ ଧାନ ମାଣ ବସାଇ l

     ଘରଣୀଙ୍କ ପୂଜା ସିନ୍ଧୁ ତନୟୀ ll

ଶସ୍ୟ ସମ୍ପଦରେ ମରତ ପୂର୍ଣ୍ଣ l

     କୃଷକ ଖଳାରେ କଳେଇ ଧାନ ll

ବିଷ୍ଣୁପ୍ରୀୟା ମାଆ ବିଷ୍ଣୁ ବଲ୍ଲଭା l

   ଭକତଙ୍କ ପାଶେ ହୋଇଲେ ଉଭା ll

ଘରେ ଘରେ ପାଇ ପୂଜା ନୈବେଦ୍ୟ l

  ମାଆ ତୋଷହେଲେ ବାଜେ ବାଇଦ ll

ମାଆ କମଳିନୀ ଲୋ ପଦ୍ମାଳୟା l

    ରଖିଥିବୁ ମାଆ ତୁ ଜୀବେ ଦୟା ll

ସାଗର ଦୁଲଣୀ ବିଷ୍ଣୁ ଘରଣୀ l

     ଧନ ଧାନ୍ୟେ ପୂର୍ଣ୍ଣ କର ଧରଣୀ ll

ସନ୍ତାନେ ରଖିବୁ ଘଣ୍ଟ ଘୋଡ଼ାଇ l

      କମଳଲୋଚନୀ କରୁଣାମୟୀ ll

ନମଃ ନାରାୟଣୀ ସିନ୍ଧୁ ଦୁଲଣୀ l

     କ୍ଷୀରାବ୍ଧି ତନୟା ଲୋକଜନନୀ ll

ବନ୍ଦନା କରେ ତୋ ପଦ୍ମ ପୟର l

    ଆସୁଥିବୁ ମାଆ କୁଟୀରେ ମୋର ll