ଆସୁଛି ରଥ

ଆସୁଛି ରଥ ଉଡାଇ ନେତ

ଚାହାଁ ଚାହାଁ ସଖି ଚାହାଁ ଲୋ

ରଥରେ ବସିଛି କାଳିଆ ସାଆନ୍ତ

   ଅପୂର୍ବ ଶୋଭା କି ଆହା ଲୋ

    ନାମ ଯାର ଚଉବାହା ଲୋ ।

ଭାବର ଠାକୁର ଭାବେ ବନ୍ଧା ଯାର

    ଭକତଙ୍କ ଭାଗ୍ୟ ଡୋରି

ବସି ଚଳାଉଛି  ବଡ଼ ଦେଉଳରେ

    ସବୁ ଡୋରି ହାତେ ଧରି

ସିଏ ତ ଆସୁଛି  ନନ୍ଦିଘୋଷେ ବସି

    ରଥରେ ଲାଗିଛି ଡୋରି

  ତାକୁ, ଭକତେ ନିଏ ଘୋଷାରି ।

ଭକ୍ତ ଭଗବାନ    ହୁଅଇ ମିଳନ

    ଏଇ ଯେ ଗୁଣ୍ଡିଚା ଯାତେ

ଯାର ତିନି ପାଦେ ତ୍ରିପୁର ଆଛାଦେ

     ବାମନ ରୂପରେ ରଥେ

ସେ ରଥ ଛୁଇଁଲେ ଜୀବନରେ ଥରେ

     ପବିତ୍ର ଜୀବନ ନାଆ.

  ସଦା, ସାହା ହେବେ ଚଉବାହା ।