କୃତଜ୍ଞ ପିମ୍ପୁଡ଼ି

       

ଧାରା ଶିରାବଣ ମାସ ଲାଗିଥିଲା ଝଡ଼ି l

ଘନଘନ ବର୍ଷାପାତେ ନଦୀଥିଲା ବଢ଼ି ll

ଘନଘୋର ବଜ୍ରନାଦ ସଙ୍ଗେ ଚଡ଼ଚଡ଼ି l

ଝଟକେ ବିଜୁଳି ବୃକ୍ଷେ ପଡ଼ନ୍ତି ଉପୁଡ଼ି ll

ବୃକ୍ଷଗଣ ଯାଉଛନ୍ତି ନଦୀସ୍ରୋତେ ଭାସି l

ପିମ୍ପୁଡ଼ିଟି ଏକାଳରେ ହୋଇଲା ପିଆସି ll

ନଦୀ କୂଳେ ପହଞ୍ଚିଲା ଠୁକୁ ଠୁକୁ ଚାଲି l

କୁନି ପାଦ ଖସିଗଲା ନଈ ଚୋରାବାଲି ll

ପିମ୍ପୁଡ଼ିଟି ନଦୀସ୍ରୋତେ ଯାଉଥିଲା ଭାସି l

ଦେଖିନେଲା ପକ୍ଷୀଟିଏ ବୃକ୍ଷଡାଳେ ବସି ll

ପିମ୍ପୁଡ଼ିକୁ ଉଦ୍ଧାରିବା ଅର୍ଥେ ପକ୍ଷୀ ବର l

ଗଛରୁ ପକାଇଦେଲା ଗୋଟିଏ ପତର ll

ପତ୍ର ଧରି ପିମ୍ପୁଡ଼ିଟା ନଦୀ କୂଳେ ଆସି l

ଦେଖଇ ପକ୍ଷୀଟି ବୃକ୍ଷପରେ ଅଛି ବସି ll

ମନେ ବିଚାରିଲା ମୁହିଁ ପାଇଲି ଜୀବନ l

ନିଶ୍ଚୟ ସୁଝିବି ଦିନେ ଏ ପକ୍ଷୀର ଋଣ ll

ଅନ୍ୟ ଏକ ଦିନେ ପିମ୍ପୁଡ଼ିଟି ଦେଖିଦେଲା l

ପକ୍ଷୀକୁ ବାଣୁଆ ଏକ ଶର ଯୋଖୁଥିଲା ll

ଧାଇଁ ବାଣୁଆ ପାଦରେ କାମୁଡ଼ିଲା ରୁଟ l

ବାଣୁଆର ଶର ତହୁଁ ହେଲା ଲକ୍ଷ୍ୟଭ୍ରଷ୍ଠ ll

ତୀରାବାଜେ ପକ୍ଷୀଗଲା ଫୁରକିନା ଉଡ଼ି l

ଧନ୍ୟରେ ଧନ୍ୟରେ ତୁହି କୃତଜ୍ଞ ପିମ୍ପୁଡ଼ି ll