କୃଷକ ଭାଇ
କୃଷକ ଭାଇ
କୃଷକ ଭାଇରେ କୃଷକ ଭାଇ
ଦେଶର ପ୍ରଗତି ତୋହରି ପାଇଁ ।
ଦେଶ ସେବା ପାଇଁ କରିଛୁ ପଣ
ସୁଝିକି ପାରିବ କିଏ ତୋ ଋଣ ।
କୃଷି କାମ ଯୋଗୁଁ ନାମ କୃଷକ
ଖାଦ୍ୟ ଯୋଗାଉତୁ ବରଷ ଯାକ ।
ନିଜେ ପିନ୍ଧି ତୁହି ଛିଣ୍ଡା ବସନ
ବଢ଼ାଉରେ ତୁହି ଦେଶର ମାନ ।
ରାତି ନପାହୁଣୁ ତୁ ଉଠିଥାଉ
ଖତ ନେଇ ତୁହି ଶଗଡ଼େ ଯାଉ ।
ନିଜେ ସହି ଖରା, ବରଷା, ଶୀତ
ବିଲେ ହଳ କରୁ ଗାଇତୁ ଗୀତ ।
ସତେକି ତୋ ଦେହ ଅଟେ ପାଷାଣ
ଠେକା,ବାଡ଼ି,ହଳ ତୋର ଭୂଷଣ ।
ମାଟିର ମଣିଷ ତୁହିରେ ଅଟୁ
ମାଟି ସହ ମାଟି ହୋଇ ତୁ ଖଟୁ ।
ମାଟିରୁ ତୁହିରେ ଫଳାଉ ସୁନା
ତୋ ଲାଗି ଉଡ଼େରେ ଏ ଦେଶେ ବାନା ।
ଯାଦୁଗର କେହି ତୋ ପରି ନାହିଁ
ତୋ ମନ୍ତ୍ରେ ହସଇ ଟାଙ୍ଗରା ଭୂଇଁ ।
ତୋ ପରଶେ ଧରା ହୁଏ ଶ୍ୟାମଳା
କ୍ଷିତିକୁ ପିନ୍ଧାଉ ଶସ୍ୟର ମାଳା ।
ଦେଶବାସୀଙ୍କୁ ତୁ ଦଉ ଆହାର
ତୋ ଘର ସତେକି କୁବେର ପୁର ।
ଦୀପ ପରି ତୁହି ଜଳୁରେ ସଦା
ଦୂରେଇ ଦଉତୁ ଦେଶରୁ କ୍ଷୁଧା ।
କୃଷକ ଭାଇରେ କୃଷକ ଭାଇ
ତୋ ଭଳି ବନ୍ଧୁ ଏ ମହୀରେ ନାହିଁ ।
କରେନା କେହିରେ ତୋପରି ପୂଣ୍ୟ
ଧନ୍ୟ ତୋ ଜୀବନ ଜୟ କିଷାନ୍ ।