କରୋନା ଓ ବିଚଳିତ ଜୀବନ
କରୋନା ଓ ବିଚଳିତ ଜୀବନ
ଭୟଙ୍କର ଏକ କୃଷ୍ଣ ଗର୍ତ୍ତ ସମ
ଆସିଲା କରୋନା ମାଡ଼ି
କରାଳ ତା ଗ୍ରାସେ ଥରିଲା ମେଦିନୀ
ଶୁଭିଲା ଭୈରବ ରଡି ।
ଘୋର ଦନ୍ତ ପାଟି ଲେଲୀହାନ ଜିହ୍ଵା
ଉଦଗାରେ ବିଷ ଅନଳ
ଶାଣିତ ତା ପଞ୍ଝା ଅଦୃଶ୍ୟ ଆତଙ୍କେ
ଦଶଦିଶ କମ୍ପମାନ ।
ପଡିଗଲା ତାଟି କବାଟ ସବୁଠି
ରାସ୍ତା ଘାଟ ଶୂନଶାନ
ଟଳମଳ ହେଲା ଦେଶ ଅର୍ଥନୀତି
ଅସ୍ଥିର ଜନଜୀବନ ।
ପୋକ ମାଛି ପରି ମରିଲେ ଅନେକ
ପଥି ଅଉଷଧି ବିନା
ଘର ମୁହାଁ ହୋଇ ଭୋଗିଲେ ଶ୍ରମିକ
ଅକଥନୀୟ ବେଦନା ।
ଭିଡ଼ ଓ ଗହଳି ହୋଇଛି ବାରଣ
ସଭା ସମାବେଶ ମନା
ଖୋଲୁ ନାହିଁ ଦେବ ଦେବୀଙ୍କ ମନ୍ଦିର
ଦୁଆରେ ଝୁଲଇ ତାଲା ।
ବହୁ ଆୟାସରେ ପ୍ରତିକାର ପାଇଁ
ଟୀକା ହେଲା ଉଦ୍ଭାବନ
ଚାଲୁ ରହିଅଛି ସର୍ବ ଜନ ହିତେ
ସମୂହ ଟୀକାକରଣ ।
ସତର୍କତା ପାଇଁ ଜାରି ରହିଅଛି
କର୍ଫ୍ୟୁ ଓ ନିଷେଧାଦେଶ
ଘୋର ଏ ବିପଦୁ ସଳଖିବା ଅଣ୍ଟା
କରୋନା ନିଶ୍ଚୟ ହାରିବ ।
ଜୀବନ ଜୀବିକା ସବୁ ବିପର୍ଯ୍ୟସ୍ତ
ବିଚଳିତ ଜନମନ
ଲଢ଼ିବାକୁ ହେବ ମରଣ ସହିତ
ଜିଣିବ ନିଶ୍ଚେ ଜୀବନ ।