କ୍ରୋଧର ପରିବାର ଓ ତାର ପରିଣାମ
କ୍ରୋଧର ପରିବାର ଓ ତାର ପରିଣାମ
କ୍ରୋଧ ମନୁଷ୍ୟର ପରମ ଶତ୍ରୁ ଟି
କରିଦିଏ ତାକୁ ନଷ୍ଟ
ପରିବାର ନେ଼ଇ କ୍ରୋଧ ଜନ୍ମ ହୁଏ
ବଢ଼ିଗଲେ ଅସନ୍ତୁଷ୍ଟ ।
ମାଆ ନାମ ତାର ଅଟଇ ଉପେକ୍ଷା
ବାପା ନାମ ଅଟେ ଭୟ
ପୁଅ ନାମ ଶତ୍ରୁ ,ନିନ୍ଦା ଓ ଚୁଗୁଲୀ
ଅଟନ୍ତି ତା ଦୁଇ ଝିଅ ।
କ୍ରୋଧର ଭଉଣି ନାମ ଅଟେ ଜିଦି
ପତ୍ନୀର ନାମଟି ହିଂସା
ବଡ ଭାଇ ନାମ ଅଟେ ଅହଙ୍କାର
ବୋହୂର ନାମ ଟି ଈର୍ଷା ।
ନାତୁଣୀର ନାମ ଘୃଣା ଦେଇଅଛି
ରଖିଥାଏ ଯତ୍ନ କରି
ଏମାନଙ୍କୁ ନେଇ କ୍ରୋଧ ସଂସାରରେ
ରହିଥାଏ ଘରକରି ।
କ୍ରୋଧ ପ୍ରଭାବରେ ବୁଦ୍ଧିନାଶ ହୁଏ
ବଢ଼ିଣ ଯାଏ ଅଜ୍ଞାନ
ବୁଦ୍ଧି ଜ୍ଞାନ ନଷ୍ଟ ହେଲେ ଯେ ମଣିଷ
କରେ ଅନ୍ୟାୟ ଅଧର୍ମ ।
କ୍ରୋଧ ମନୁଷ୍ୟର ମାନସିକତାକୁ
ଦୁର୍ବଳ ଯେ କରିଦିଏ
ମସ୍ତିଷ୍କର ନାଡ଼ି ମଣ୍ଡଳ, ରକ୍ତକୁ
ଦୂଷିତ ଯେ କରିଦିଏ ।
ମନର କ୍ଷୋଭକୁ ତୀବ୍ର କରି ବାରେ
ସାହାଯ୍ୟ କରଇ କ୍ରୋଧ
କ୍ରୋଧକୁ ମନରୁ ଦୂର କରିଦେଲେ
ହୁଏ ଜଗତେ ପ୍ରସିଦ୍ଧ ।
ରାଗ ହିଂସା ବ୍ରହ୍ମ ଚଣ୍ଡାଳଯେ ଜାଣ
ନ କରିଲା କାମ କରେ
ବିଚାର ଜ୍ଞାନକୁ କରଇ ହରଣ
ନୀଚ କରେ ସମାଜରେ ।
କ୍ରୋଧକୁ ବିନାଶ କରି ଦିଅ ବନ୍ଧୁ
ମନରେ ନ ରଖି ଦ୍ଵନ୍ଦ
ଯେତେଦିନ ଯାଏଁ ବଞ୍ଚି ରହିଥିବ
ପାଇବ ପରମାନନ୍ଦ ।