କର୍ମଫଳ

ଖୋଜୁଛି ମଣିଷ କରମଫଳକୁ

କେବଳ କାମ ଅରଥେ

ଧରମରେ ଦ୍ୱନ୍ଦ୍ୱ ବାଧା ପ୍ରତିବନ୍ଧ

ତାଲା ଝୁଲେ ମୋକ୍ଷ ପଥେ ।

କାଷ୍ଠ ପାଷାଣର ଈଶ୍ୱର ନିର୍ଲିପ୍ତ

ଜୀବନ ବିପଥଗାମୀ

ଧରମଗ୍ରନ୍ଥର ମନ୍ତ୍ର ଯନ୍ତ୍ର ତନ୍ତ୍ର

ନିରର୍ଥକ ସ୍ୱାର୍ଥକାମୀ ।

କଳୁଷ ପଙ୍କରେ ଇହଲୋକ ନର୍କ

ବିଜ୍ଞାନ ଜ୍ଞାନ ଦୂଷିତ

ସ୍ୱପ୍ନ ସତ୍ୟ ଶାନ୍ତି ଛାୟା କଳ୍ପବଟ

କର୍ମଫଳ ପରାହତ ।

ସ୍ୱସ୍ତିକ ଚକ୍ରରେ ଚଉବର୍ଗ ଲାଭ

ସ°ସାରେ ବଡ଼ ଦୁର୍ଲଭ

ତ୍ୟାଗ ସେବା ନିଷ୍ଠା ସାମାଜିକ ନ୍ୟାୟ

ପରିଣାମ ପରାଭବ ।

ସମ୍ବନ୍ଧ ସମ୍ପର୍କେ ଅଭାବ ବିଶ୍ୱାସ

କଟୁତିକ୍ତ ହଳାହଳ

ସ°ସାରେ ଜୀବନ ଅତିଷ୍ଠ ଆତୁର

ବିଷମୟ କର୍ମଫଳ ।

ଶିକ୍ଷା ପ୍ରଶାସନ ସମାଜ କଲ୍ୟାଣ

ସ୍ଥିରତା ସହାବସ୍ଥାନ

ହେଉ କଳ୍ପବଟ ସୁଖଦ ବରଦ

ଜୀବନ ଲକ୍ଷ୍ୟ ସାଧନ ।

ହେଉ ଭବିଷ୍ୟତ ଉଜ୍ଜ୍ୱଳ ସୁନ୍ଦର

କର୍ମଫଳ ପ୍ରାଣପୂର୍ଣ୍ଣ

ହେଉ ଅନ୍ତରୀକ୍ଷ ପିତୃ ଦେବଲୋକ 

ଆଲୋକ ପଥ ସୁଗମ ।