ଲାଇବ୍ରେରୀ
ପ୍ରୋଫାଇଲ୍
କରିଦିଅମତେ
କରିଦିଅମତେ
1 min
405
କରିଦିଅ ମତେ କ୍ଷୁଦ୍ର ଦୀପ ଟିଏ
ଜଳୁଥିବି ଦିବାନିଶି
ଅମା ଅନ୍ଧାରକୁ ଦୂରିଭୂତ କରି
ପ୍ରକାଶିବି ଜ୍ୟୋତିରାଶି
କରିଦିଅ ମତେ କ୍ଷୁଦ୍ର କଳି ଟିଏ
ମହକାଇ ଦେବି ଧରା
ସବୁରି ମନେ ଭରି ପ୍ରୀତି ସୌରଭକୁ
ବାଣ୍ଟିବି ପିୟୂଷ ଧାରା
କରିଦିଅ ମତେ କ୍ଷୁଦ୍ର ବିହଙ୍ଗମ
ଉଡୁଥିବି ଡେଣାଝାଡି
ମୁକ୍ତ ଗଗନରେ ମୁକ୍ତି ମନ୍ତ୍ର ଗାଇ
ପରାଣକୁ ମୋହି ନେବି
କରିଦିଅ ମତେ କ୍ଷୁଦ୍ର ଦୁର୍ବାଦଳ
ପଥପ୍ରାନ୍ତେ ରହିଥିବି
ବିନା ପ୍ରତିବାଦେ ପଦାଘାତ ସବୁ
ମଥାପାତି ସହିନେବି
କରିଦିଅ ମତେ କ୍ଷୁଦ୍ର ନିର୍ଝରିଣୀ
ଗିରିବୁକେ ବହୁଥିବି
ଶୀତଳ ମଧୁର ସଳୀଳ ଧାରାରେ
ତୃଷ୍ଣା ନିବାରୁଥିବି
କରିଦିଅ ମତେ କ୍ଷୁଦ୍ର ଭୃଙ୍ଗ ଟିଏ
ଫୁଲେ ଫୁଲେ ଉଡୁଥିବି
ମନ ବାସନାକୁ ଜଳାଞ୍ଜଳି ଦେଇ
ସୁଧା ରସ ବାଣ୍ଟିଦେବି
କରିଦିଅ ମତେ କ୍ଷୁଦ୍ର ତାରା ଟିଏ
ନଭରେ ବିଚରୁଥିବି
ତମସାଚ୍ଛନ୍ନ ଯାମିନୀ କୋଳେ ରହି
ଉଜ୍ଜଳ କରିବି ମହି
କରିଦିଅ ମତେ କ୍ଷୁଦ୍ର ଜଳବିନ୍ଦୁ
ମେଘ କୋଣେ ରହିଥିବି
ନଦୀ ପ୍ରବାହରେ ଭାସିଯାଇ ମୁହିଁ
ସାଗରେ ବିଲୀନ ହେବି
