କୋଉଠି ଥୋଇବି

ମିଶ୍ର ନନା ଆମ ଯାଇଥିଲେ ଦିନ

ମାଛ ଆଣିବାକୁ କେଉଟ ସାହି

କେଉଟ ଟୋକାକୁ ବରାଦ କରିଲେ

ବଡ ମାଛ ଗୋଟେ ଦେବୁ ପଠାଇବା

କେଉଟ ଟୋକା ଯେ ମାଛଟାଏ ଧରି

ପହଞ୍ଚିଲା ଯାଇ ଘରେ ତାଙ୍କର 

ସେବେଳେ ଘରଣୀ ଝାଡୁ କରୁଥିଲେ 

ଝାଡୁ ଧରି ତାଙ୍କ ଘରବାହାର

କେଉଟ ଟୋକାଟା ପଚାରିଦେଲା ଯେ

"ଭାଉଜ, କୋଉଠି ଥୋଇବି କୁହ"

ପଣ୍ଡିତିଆଣୀ ଯେ ରାଗିକି କହିଲେ,

"କ'ଣ କହିଲୁ ରାଣ୍ଡୀର ପୁଅ"

ଏଇ କଥାରୁ ଯେ ଲାଗିଲା ଝମେଲା

ସାହିଲୋକ ସବୁ ଏକାଠି ହେଲେ

କୋଉ କଥାରୁ ଏ ଝମେଲାଟା ହେଲା 

ସଭିଏଁ ମିଶିକି ବିଚାର କଲେ

"କୋଉଠି ଥୋଇବି" ଛଅଟା ଅକ୍ଷର 

ଅର୍ଥ ତାର ଅଟେ ଅତି ସରଳ

ହେଲେ ଏ କଥାଟା ପଣ୍ଡିତିଆଣୀଙ୍କୁ

ଲାଗିଲା ସତେ ଯେମିତି ଗରଳ

ମିଶ୍ର ନନା ସେତେବେଳକୁ ଆସିଲେ 

ମାଛ ନେଇ ତାକୁ ପଇସା ଦେଲେ 

ନିଜ ଘରଣୀର ସବୁ ଦୋଷ ଜାଣି 

କଅଁଳେ ବୁଝାଇ ତାକୁ କହିଲେ

କଥାର ମରମ ନ ବୁଝି କାହିଁକି 

ଏମିତି ମିଛରେ ରାଗୁଛ ତୁମେ

ଏଇମିତି ହେଲେ ସାଇପଡିଶାରେ

ଭଲରେ ଚଳିବା କେମିତି ଆମେ

ଛୋଟିଆ କଥାକୁ ବଡ କଲେ ଖାଲି

ଅଶାନ୍ତି ଝଗଡ଼ା ହୁଅଇ ସୃଷ୍ଟି 

ଥଣ୍ଡା ମୁଣ୍ଡ କରି ବୁଝିଲେ କଥାକୁ

କେତେ ଅସୁବିଧା ଯାଆନ୍ତା ତୁଟି