କନିଷ୍ଠ ଶିକ୍ଷକ ନିଯୁକ୍ତି ଆମର ଦାବି

ଗରଜିବ ପୁଣି ଭୂବନେଶ୍ବର

   ଥରିବ ବିଧାନସଭା

କନିଷ୍ଠ ଶିକ୍ଷକ ନିଯୁକ୍ତି ଦାବିରେ

   କରିବା ଚାଲ ହେ ସଭା ।

ପାଖେଇ ଆସିଲା ଜୁଲାଇ ପଚିଶ

   ଓଜେଟା ଦେଇଛି ଡ଼ାକ

ଶିକ୍ଷା ବ୍ୟବସ୍ଥାର ଉଦ୍ଧାର ପାଇଁ କି

   ଚାଲ ହେବା ଥରେ ଏକ ।

କାମ ଧନ୍ଦା ସବୁ ରଖିଦିଅ ଘରେ

    ଭୂବନେଶ୍ବରକୁ ଚାଲ

ନବୀନ ସମୀର ଶୋଇଛନ୍ତି ଦୁହେଁ 

  ଚେତେଇଦେବା ହୋ ଚାଲ ।

ନିଘୋଡ଼ ନିଦରେ ଶୋଇଛନ୍ତି ଦୁହେଁ

    ଚିନ୍ତା ନାହିଁ ଜମା ତାଙ୍କ

ପ୍ରାଥମିକ ଶିକ୍ଷା ମରଣ ଶେଜରେ

   ଶିକ୍ଷାମନ୍ତ୍ରୀ ତୁମେ ଧିକ ।

ଛଅ ବର୍ଷ ହେଲା ବସିଅଛୁଁ ଘରେ

   ନିଯୁକ୍ତି ର ଦେଖା ନାହିଁ

ସ୍କୁଲ ଗୁଡିକରେ ଶିକ୍ଷକ ନାହାନ୍ତି

   ଶିକ୍ଷକ ନିଯୁକ୍ତି କାହିଁ ।

ଏଡେ ନିରିଦୟ ନବୀନ ସମୀର

   ଟିକେ ତୁମ୍ଭ ଦୟା ନାହିଁ

ପ୍ରାଥମିକ ଛୁଆ ଶିକ୍ଷକ ମାଗଇ 

    ଟିକେ ଶୁଣ ନାହିଁ କାହିଁ ।

କେମିତି ପଢ଼ିବେ ପାଠ ଯେ ପିଲାଏ

    କୋଠା ଘର ଠିକ୍ ନାହିଁ

 ଗୋଟିଏ କୋଠାରେ ଚାରି ଗୋଟି ଶ୍ରେଣୀ

     ପଢୁଛନ୍ତି ଏଠି କାହିଁ ।

ଯବାବ୍ ଦିଅ ହେ ଶିକ୍ଷା ମନ୍ତ୍ରୀ ତୁମେ

‌‌    ମିଛ କୁହ କାହିଁ ପାଇଁ

ସ୍କୁଲ ଗୁଡିକରେ ଶିକ୍ଷକ ଅଛନ୍ତି

    ବୋଲି କୁହ କାହିଁ ପାଇଁ ।

କାହିଁ ଅତ୍ୟାଚାର କରୁଅଛ ତୁମେ

   ଛୋଟ ଶିଶୁଙ୍କ ଉପରେ

ଓଡ଼ିଶାକୁ ତୁମେ ଦୁର୍ବଳ କରୁଛ

   ଶିକ୍ଷାକୁ ରଖିକି ଦୂରେ ।

ହେତୁ ଜ୍ଞାନ ଯଦି ତୁମର ଅଛି ହେ

    ଶିକ୍ଷକ ନିଯୁକ୍ତି ଦିଅ

କନିଷ୍ଠ ଶିକ୍ଷକ ନିଯୁକ୍ତି ଦେଇକି

   ସମ୍ମାନ ଫେରାଇ ନିଅ ।

ନହେଲେ ଦେଖିବ ଭୂବନେଶ୍ବର ରେ

     ଉଠିବ ନିଯୁକ୍ତି ସ୍ବର

କମ୍ପମାନ ହେବ ରାଜଧାନୀ ରାସ୍ତା 

    ତୁମେ ହେବ ଥରହର ।

ଜାଗରେ ଜାଗରେ ଶିକ୍ଷକ ଆଶାୟୀ

     ନିଯୁକ୍ତି ମାଗିବା ଚାଲ

ନିଜ ଅଧିକାର ନିଜ ହାତେ ଅଛି 

    ଛଡେଇ ଆଣିବା ଚାଲ ।