କଳାନିଧି କଳାହାତୀ
କଳାନିଧି କଳାହାତୀ
କଳାନିଧି କଳାହାତୀ
କଳା କଳେବର କଜ୍ଜଳ କାନ୍ତି,
କଳାପ ଛତି,
କମଳିନୀ ପ୍ରାଣପତି ।
କାମୀ କାମିନୀ ମେଳିଆ
କାଳିନ୍ଦୀ କୂଳିଆ ଘନ କାଳିଆ
କାଳୀ ଦଳିଆ,
କାଇଞ୍ଚ କାଚ ମାଳିଆ ।
କିଶଳୟ କାନ୍ତି ଜିତ
କିରଙ୍ଗରେ ନାଚି କର ମୋହିତ
କିବା ବିଚିତ୍ର
କିଣ ଜବାଧରୀ ଚିତ୍ତ ।
କୁଳବଧୂ ତେଜି ବ୍ରୀଡ଼ା
କୁଞ୍ଜ ବନେ ଯାଇ ହୁଅନ୍ତି ଛିଡ଼ା
କୁଧରେ କ୍ରୀଡା
କୁଶାସନେ,ଶକ୍ରେ ପୀଡ଼ା ।
କୃପାଳୁ ରାଧାରମଣ
କୃଷ୍ଣା ଲଜ୍ଜା କରିଥିଲ ବାରଣ p
କୃଷ୍ଣମୋହନ
କୃଶାନୁକଲ ଭକ୍ଷଣ ।
କେଶବ କଂସାରି ହରି
କେତେ ଲୀଳାକର ମର୍ତ୍ତ୍ୟେ ବିହରି
କେ ପାରେ କଳି
କେଳିକଳା କଉଶଳୀ ।
କୈବଲ୍ୟ ମୁକତି ଦାତା
କୈଟଭ ମେଦରେ କ୍ଷିତି ନିର୍ମାତା
କୈବର୍ତ୍ତ ତ୍ରାତା
କୈତବେ ଖଳ ନିହନ୍ତା ।
କୋପ କୃପା ଯା ସୁଷମ
କୋଦଣ୍ଡ ଧାରଣ ପୁରୁଷୋତ୍ତମ
କୋଟି ପ୍ରାକ୍ରମ
କୋଶଳୁ ଲଙ୍କାତିକ୍ରମ୍ୟ ।
କୌସ୍ତୁଭ କଣ୍ଠ ପଦକ
କୌରଵ ଦଳା କୌନ୍ତେୟ ପାଳକ
କୌଣପ ପର
କୌମୁଦୀଧର ଉଦ୍ଧର ।