କଳା ଠାକୁର

କଳା ଠାକୁର, ବିଚିତ୍ର ଲୀଳା ତୁମର

ଦରିଆ କୂଳରେ ଦାରୁବ୍ରହ୍ମ ରୂପ 

କେଡେ ସୁନ୍ଦର ହେ କଳା ଠାକୁର ।

ମହୋଦଧି କୂଳେ ପୂଣ୍ୟ ନୀଳାଚଳେ

ମେଘନାଦ ଘେରା ପ୍ରାଚୀର ଭିତରେ

ଆବୋରି ବସିଛ ରତ୍ନ ସିଂହାସନେ 

କେଡେ ସୁନ୍ଦର ହେ କଳା ଠାକୁର ।

କଳ୍ପବଟ ମୂଳେ ଶ୍ରୀମନ୍ଦିରେ ଉଡେ

ପତିତପାବନ ବନା କୁତୁହଳେ

ଶୂନ୍ୟ ଆକାଶର ବୁକୁଚିରି ଦୋଳେ

ହୋଇ ବିଭୋର ହେ କଳା ଠାକୁର ।

ସିହଦ୍ଵାର ଦେଶେ ଅରୁଣ ସ୍ତମ୍ଭରେ

ବିଜୟ ଅରୁଣ ପ୍ରଣମ୍ୟ ମୁଦ୍ରାରେ 

ବିନତା ନନ୍ଦନ କରନ୍ତି ବନ୍ଦନ

ଯୋଡ ହସ୍ତର ହେ କଳା ଠାକୁର ।

ବିମଳା କମଳା ସର୍ବ ସୁର ଗଣ

ବେଢା ଚତୁଃପାର୍ଶ୍ଵେ ଧ୍ୟାନମୁଦ୍ରା ମଗ୍ନ

ସର୍ବ ପୂଣ୍ୟତୋୟା ନଦୀ ଜଳ କୂପ 

ଶୀତଳା ଜଳ ହେ କଳା ଠାକୁର ।

ବ୍ରହ୍ମା ରୁଦ୍ର ବନ୍ଦ୍ୟ ଅପ୍ସାରା ଗନ୍ଧର୍ବ

ନୃତ୍ୟ ଗୀତ ଛନ୍ଦେ ବାଜୁଅଛି ବାଦ୍ୟ

ବର୍ଣ୍ଣାଢ଼୍ୟ ଉତ୍ସବ ବିଳାସ ବ୍ୟସନେ 

କର ବିହାର ହେ କଳା ଠାକୁର ।

କେତେ ଦୁଃଖ କେତେ କୃର ଅତ୍ୟାଚାର 

ଜୀବନ ଯୁଇରେ ଜଳୁଛି ସଂସାର

ସବୁ ଜାଣି ଶୁଣି ମଉନେ ବସିଛ 

କମଳା ବର ହେ କଳା ଠାକୁର ।

ନହୁଅ ନିର୍ଦ୍ଦୟ ଆହେ ଦୟାମୟ

ସଚରାଚର ତ ତୁମରି ଆଶ୍ରୟ

ତୁମ ବିନା କାହିଁ ଗତି ପରାଂଗତି 

ଯେ ପୀତାମ୍ବର ହେ କଳା ଠାକୁର ।