ସମ୍ପର୍କର ଠିକଣା କି ଜଣା

ଏମିତି ତ ରାତି ନାହିଁ ସ୍ଵପ୍ନ ଜମା ଆସିନାହିଁ

ତମ ନାମ ସାଥେ ମୋ ନାମ ଲେଖା

ଏମିତି ବି ଦିନ ନାହିଁ ତମ ଅପେକ୍ଷାରେ ରହି

ହୋଇନାହଁ କେବେ ଦେଖା ।

ଏମିତି ପୁର୍ଣ୍ଣିମା ଚାନ୍ଦରେ ମୁଁ ଲେଖିନାହିଁ

ତମ ନାମ ଠିକଣା ଗାଁ

ଏମିତି ଅମାବାସ୍ୟା କାହିଁ ଘୋର ଅନ୍ଧକାରେ ରହି

ଲେଖୁ ଲେଖୁ ଲେଖିନି ତମ ନାଆଁ ।

ଏମିତି ଫଗୁଣ ନାହିଁ ତମ ପାଦ ଛୁଇଁ ନାହିଁ

ନହେଉ ବି ତମ ସହ ଦେଖା

ଏମିତି ମଳୟ କାହିଁ ବା ବତାସ ବହିନାହିଁ

ଚନ୍ଦନ କସ୍ତୁରୀ ଯାର ନାଆଁ ।

ଏମିତି ଶ୍ରାବଣ କାହିଁ ଶ୍ରାବଣୀ ସାଧବ ବୋହୂକୁ କହି

ମୋ ପାଖରେ ହୋଇନାହିଁ ଠିଆ

ଏମିତି ବି ଗୀତ ନାହିଁ ସ୍ଵରରେ କୋଇଲି ଥାଇ

କହିଦିଏ ଇନ୍ଦ୍ରଧନୁ ଛଳନା ନକରି ଏଠୁ ଯାଆ ।

ଏମିତି ଗପଟେ କହି ବୁଢୀମା କୋଉଠି କାହିଁ

ଶୁଆଇନି ନାତିକୁ ତା ଡାକି ବାବୁ ଆ ଆ

ଏମିତି ସକାଳ କାହିଁ ନିଦ ଯାର ଭାଙ୍ଗି ନାହିଁ

ଶୁଣି କାଉର କାଆ କାଆ ।

ଏମିତି ବି ନଈ ନାହିଁ ସମୁଦ୍ରରେ ମିଶିଯିବା ପାଇଁ

ଉଠିପଡ଼ି ଗଡି ତେଢ଼ା ମେଢ଼ା ଧାଆଁ

ଏମିତି ବି ବାହିନାହିଁ କିଏ କେବେ ପଢ଼ିନାହିଁ

ଗୀତା ଭାଗବତ ଯାର ନାଆଁ ।