କଳା ଶ୍ରୀମୁଖ

ଷାଠିଏ ପାଉଟି ପାଉନି ଯଦି ରେ

କହ ଦେବି ତୋତେ ମୋ ପେଟ ଦାନା

ପାଟ ପିତାମ୍ବରୀ ନିଅଣ୍ଟ କି ତୋର

ପିନ୍ଧିବାକୁ ମନ ମୋ ଛିଣ୍ଡା କନା

ତୁ ପରା ବୋଲାଉ ଜଗତ ର ନାଥ

ମୋ ଧନ ରେ ତୋର ବଢୁଛି ଲୋଭ

ଦେଲେ ଯେତେ ଦୁଃଖ ଦେଉଥା ରେ ଜାଗା

ନାହିଁ ମୋ ମନ ରେ ଟିକିଏ କ୍ଷୋଭ

ରହିଚୁ ବୋଲି ତୁ ବଡଦେଉଳ ରେ

ହସୁଚୁ କାଳିଆ ରଙ୍ଗ ଅଧରେ

ତୋ ସିଂହ ଦୁଆରେ ନିତି ପରା ଆସି

ମୋ ଆଖି ଲୁହ ର ପ୍ରଦୀପ ଜାଳେ

ସୁଖରେ ଥାଆ ରେ ମୋ କଳା ସାଆନ୍ତ

ନ ଲାଗୁ ରେ ତୋତେ କାହା ନଜର

ମୁଁ ପରା ଗୋଟିଏ ଜନମ ଦୁଃଖୀ ରେ

ଦୁଃଖ ତ ମୋ ପାଇଁ ଅତି ନିଜର

କରିବିନି ମାନ ହେ ଚକାଆଖିଆ

ଦେଲେ ଦେ ପଛେ ନରକ ଦୁଃଖ

ଭୁଲିଯାଉଥିବି ସବୁ ଯାତନା ଯନ୍ତ୍ରଣା

ଦେଖି ଦେଇ ମୋର କାଳିଆ ମୁଖ 

 ନ ଦେ ପଛେ ସୁଖ ଚାହୁଁନାହିଁ ମୋକ୍ଷ 

 ପଡ଼ିଥାଏ ମୁଁ ହୋଇ ପତିତ

 ଦିନ କାଟୁଥିବି ତୋ ବଡ଼ଦାଣ୍ଡ ରେ

 ଦେଖି ଦେଖି ତୋର କଳା ଶ୍ରୀମୁଖ