କିଂ ଆଶ୍ଚର୍ଯ୍ୟମ୍
କିଂ ଆଶ୍ଚର୍ଯ୍ୟମ୍
#ସିଧାକଥା-୧୧୬
ପାଠରେ ଶାଠରେ ଜ୍ଞାନରେ ବୁଦ୍ଧିରେ ଧନରେ ଥାଇ ଦୁର୍ବଳ,
ଅଧମ ଅକ୍ଷମ ଅଯୋଗ୍ୟ ବି ଭାବେ ମୁଁ ଏକା ଜଣେ ସବଳ |
ମଣିଷ ଭଳି ସେ ଦିଶୁଥାଏ ସିନା କହିବାକୁ ଭାଷା ନାହିଁ,
ତଥାପି ସେ ଭାବେ ପଣ୍ଡିତ-ଶାସକ ହୋଇପାରେ ଦିନେ ମୁହିଁ |
ଭାଗ୍ୟବଳେ କିବା ଦୟାବଳେ ଯଦି ପାଏ ସେ କ୍ଷମତା କିଛି,
କ୍ଷମତା ବଳରେ ଜନତା ଧନକୁ ଖାଇଦିଏ ପୋଛି-ପାଛି |
ଅଳପ ଜନରେ ଅଧିକାର ଦେଲେ ପାଗଳ ହୁଏ ସେ ପ୍ରାଣୀ,
ବିଲେଇ ପଛରେ ମାଙ୍କଡ଼ର ଲାଞ୍ଜ ଲାଗିଛି ପାରେନା ଜାଣି |
ଅଭାଗା ଜନତା ଅସହାୟହୋଇ କରେ ତାକୁ ନମସ୍କାର,
ତା'ର କୁକର୍ମକୁ ଦେଖି ଜାଣି, ପରେ କରେ ନିନ୍ଦା ତିରସ୍କାର |
ବିବେକ ଦମନ କରିପାରେ ସିଏ ଧର୍ମ-ନ୍ୟାୟକୁ ନମାନି,
ଧନ ଠୁଳକରି ଲୋଭରେ ନିଜକୁ ହାଜତକୁ ନିଏ ଟାଣି |