କିଏ ଶୁଣିବ ଆସ ଆମର କାହାଣୀ

ଅତି ଛୋଟ ଜୀବଟି ଆମେ 

               ଥାଉ କର୍ମରେ ରତ,

ଆହାର ଖୋଜିବା ପାଈଁକି

               ବୁଲୁଛୁ  ଇତଃସ୍ତତ l(1)

ଆହାର ଯେଉଁଠି ପାଉଛୁ 

                ତାକୁ ଆଣୁଛୁ ଟାଣି,

ଖାଦ୍ୟର ବାସନା ବାଜିଲେ 

                ସବୁ ପାରୁଛୁ ଜାଣି l (2)

ଆମେ ସଭିଏଁ ବାସ କରୁ

                ଅତି ଛୋଟ ଗର୍ତ୍ତରେ,

ଯେତେ ବାଧା ବିଘ୍ନ ଆସିଲେ

                ରହୁ ଏକଜୁଟରେ, l (3)

କାମୁଡି ଦେଲେ ଯେ ତୁମକୁ

                 ତୁମେ କୁଣ୍ଡାଇ ଦିଅ,

କଣ କାମୁଡୁଛି ନ ଦେଖି

                ସେଠାରେ ମନ୍ଥି ଦିଅ l (4)

ଘାଆ ପରି ଫୋକା ହୁଅଇ

               ଆମେ କାମୁଡି ଦେଲେ,

ଫର୍ମିକ ଏସିଡ ରହିଛି

              ଆମ ପାଟିର ଲାଳେ l (5)

ସର୍ବଦା କହନ୍ତି ଆମକୁ

               ଶୁଣ ଆମର ବାଣୀ,

ଦଳବଦ୍ଧ ଭାବେ ରହିଲେ

               ପାରିବେନି କେ ଜିଣି l (6)

ଯେତେ ଝଡ ଝଞ୍ଜା ଆସିଲେ

                 ତୁମେ ଏଡାଇ ଦେବ ,

ଏକଜୁଟ ଭାବେ ରହିଲେ

                 ସବୁ ହେବ ସମ୍ଭବ l (7)

ସବୁବେଳେ ସୁକର୍ମ କର

               ନ ହୋଇ ଅଳସୁଆ,

ପରିଶ୍ରମ କରିଲେ ସବୁ

               କ୍ଷେତ୍ରେ ହେବ ଆଗୁଆ l (8)

ଛୋଟ ହୋଇଲେ କଣ ହେଲା

                ଶିଖ ଆମର ଏ ଗୁଣ,

ଛୋଟ ଜୀବକୁ କେବେହେଲେ

                 ନ କର ହଇରାଣ l (9)

କୌଣସି ଜୀବକୁ କେବେ ବି

                 ଛୋଟ ଭାବିବ ନାହିଁ ,

କ୍ଷୁଦ୍ର ଠାରେ ମହତ ଗୁଣ

                 ନିହିତ ଥାଏ ରହି l (10)

ଶିକ୍ଷକ ଭଳିଆ ଶିଖାନ୍ତି

                ଯେତେ ମହତ ବାଣୀ,

ପିଲାମାନେ କେବେ ନ ଭୁଲ

                 ପିମ୍ପୁଡିର କାହାଣୀ l (11)